Demokratik partiyadan AQSH prezidentligiga nomzod Kamala Harris Amerikaning Chikago shahrida o‘z partiyadoshlarining milliy kongressida so‘zlagan nutqida, agar Amerika Qo‘shma Shtatlari prezidentligiga saylansa, Ukraina va NATOni “qat’iy qo‘llab-quvvatlash”ga vaʼda berdi.
![](/static/2024/08/23/photo_2024-08-23_19-03-50-ueuD0fmo.jpg)
Prezident sifatida men Ukraina va NATOdagi ittifoqchilarimiz tomonida qat’iy bo‘laman, dedi u Chikagodagi United Center minbaridan turib.
Avvalroq AQSHning sobiq prezidenti Barak Obama Chikagodagi Demokratik partiyaning milliy qurultoyida nutq so‘zlab, bo‘lajak prezidentlik saylovlarida o‘zining uzoq yillik siyosiy ittifoqchisi Harris nomzodini qo‘llab-quvvatlagan edi.
Amerika yangi bobga tayyor. Amerika yaxshiroq hikoyaga tayyor. Biz prezident Kamala Harris uchun tayyormiz. Kamala Harris esa ishga tayyor, deydi Obama.
Shuningdek, Cook Political Report siyosiy axborotnomasi o‘tkazgan so‘rov natijalari Harris shtatlarda aholi orasida qo‘llab-quvvatlash bo‘yicha respublikachi raqibi Donald Trampni ortda qoldirganini ko‘rsatgan edi.
Tadqiqotga ko‘ra, Harris Pensilvaniya, Viskonsin, Arizona, Michigan va Shimoliy Karolina shtatlarida Trampdan ustunlikka ega. Nevada shtatida respublikachi yetakchilik qilmoqda, Jorjiya shtatida esa har ikki nomzodni qo‘llab-quvvatlash darajasi bir xil.
Qayd etilishicha, Harris umumiy hisobda Trampdan 2 foizlik ustunlikni saqlab turibdi – respondentlarning 46 foizi uni qo‘llab-quvvatlashga, 44 foizi esa raqibini qo‘llab-quvvatlashga tayyor. Respondentlarning yana 5 foizi mustaqil nomzod kichik Robert Kennedi uchun ovoz berish niyatini bildirgan.
Izoh (0)