Surxondaryo viloyatida erkak farzandi boradigan bog‘cha issiqligidan shikoyat qilgach, bog‘chaga 4 ta konditsioner o‘rnatildi. Bu haqda bolalar ombudsmani xabar berdi.
Unga ko‘ra, bolalar ombudsmaniga Surxondaryo viloyatida yashovchi A.N.ning murojaati kelib tushdi. Fuqaro unda voyaga yetmagan farzandi Qumqo‘rg‘on tumanida joylashgan maktabgacha ta’lim muassasasiga qatnashini, bog‘cha binosi yaqinda qurilgan bo‘lsa-da, ichimlik suvi bilan ta’minlanmagani, binoda sovitish tizimlari yo‘qligi, yoz kunlarida xonalar haddan ziyod issiqligi, bu esa bolalar sog‘lig‘i uchun xavfli ekani, shuningdek, muassasa hovlisidagi barcha daraxtlar qurib qolganini bildirgan.
Bolalar ombudsmani so‘rovi asosida mazkur holat Surxondaryo viloyati prokuraturasi tomonidan o‘rganildi. O‘rganish davomida murojaatdagi holat tasdig‘ini topib, maktabgacha ta’lim tashkiloti xonalariga 4 dona konditsioner texnikasi o‘rnatildi.
Shuningdek, bog‘chada ichimlik suvi saqlanadigan 4 tonna sig‘imidagi maxsus inshoot toza ichimlik suvi bilan to‘ldirilishi ta’minlandi. Shu bilan birga, muassasa joylashgan hududda obodonlashtirish ishlarini olib borish va daraxtlarni sug‘orish uchun suv mavjud emasligi sababli daraxtlar maxsus texnika orqali olib kelinadigan suv bilan sug‘orilishi ma’lum qilindi.
Hozirda hududiy byudjetdan 2024-yil xarajatlar smetasiga mazkur davlat maktabgacha ta’lim tashkilotiga mablag‘ ajratilishi va 980 metr uzoqlikdan toza ichimlik suvi quvuri tortilib, bog‘cha ichimlik suvi bilan ta’minlanishi rejalashtirilgan, buning ijrosi ustidan viloyat prokuraturasi nazorat olib boradi.
Izoh (0)