Britaniyalik texnologik magnat Mayk Linch Sitsiliya qirg‘oqlarida kuchli bo‘ron paytida yaxta cho‘kib ketishi oqibatida bedarak yo‘qoldi. Bu haqda The Guardian xabar berdi.
Autonomy dasturiy ta’minot kompaniyasi hammuassisi, shuningdek, “Britaniya Bill Geytsi” nomi bilan tanilgan tadbirkor Bayesian yelkanli superyaxta bortida bo‘lgan. Halokat Portichello shahri yaqinida kuzatilgan. Kema yo‘lovchilari ro‘yxatida 22 kishi bo‘lib, ularning aksariyati Buyuk Britaniya fuqarolaridir.
Hodisa oqibatida bosh oshpaz halok bo‘lgani aytilmoqda, yana olti kishi, jumladan Linch va uning 18 yoshli qizi Xanna bedarak yo‘qolgan hisoblanmoqda. Qirg‘oq qo‘riqlash xizmati bedarak yo‘qolganlar Britaniya, AQSH va Kanada fuqarolari ekanini ma’lum qilgan.
Ayni paytda 15 kishi, jumladan, Linchning rafiqasi Anjela Bakares qutqarilgan. Linch vakili izoh berishdan bosh tortgan. Britaniya Tashqi ishlar vazirligi rasmiysi Sitsiliyadagi voqeadan keyin jabrlanganlarga konsullik yordami ko‘rsatilayotganini aytgan.
Halokatga uchragan Bayesian superyaxtasi 14-avgust kuni Sitsiliyaning Milatsso portidan chiqib ketgan va oxirgi marta 18-avgust kuni kechqurun Palermo sharqidagi radarlarda “yakorda” navigatsiya maqomi bilan paydo bo‘lgan. Qutqarilgan 8 kishi mahalliy shifoxonalarga yetkazilgan. Ularning barchasi stabil holatda.
Izoh (0)