Qoraqalpog‘istonda umumiy qiymati 9,5 milliard dollarlik yangi loyihalar amalga oshirilishi kutilmoqda. Bu haqda Prezident matbuot xizmati xabar berdi.
Ma’lum qilinishicha, oxirgi 7 yilda Qoraqalpog‘iston Respublikasida 17 trillion 800 milliard so‘mlik 6 ming 784 ta loyiha amalga oshirilgan. Natijada 56 mingta ish o‘rni yaratilgan. Shu davrda 2 milliard 815 million dollarlik eksport qilingan. Bu yil respublikada umumiy qiymati 874 million dollarlik 470 ta loyiha amalga oshirilmoqda.
Bu izchil davom ettirilib, Qoraqalpog‘istonda xorijiy investor va mahalliy tadbirkorlar tomonidan umumiy qiymati 9,5 milliard dollarlik 124 ta loyiha shakllantirilgan. Shundan qariyb 1 milliard 800 million dollarlik 10 ta loyiha 19-avgust kuni davlat rahbariga taqdimot qilindi.
Loyihalarga Xitoy, Saudiya Arabistoni, Germaniya, Rossiya, Ispaniya kabi mamlakatlar kompaniyalari investitsiya kiritmoqda. Ular energetika, issiqlik ta’minoti, tog‘-kon va kimyo sanoati, qurilish materiallari, xizmat ko‘rsatish va boshqa tarmoqlarni qamrab olgan.
-6P5KoB9J.jpg)
Xususan, Saudiya Arabistoni bilan hamkorlikda Nukus shahrida markazlashgan issiqlik ta’minoti tizimini yaxshilash, Ispaniya investitsiyasi ishtirokida Qorao‘zak tumanida quyosh va shamol elektr stansiyalari qurish, germaniyalik investorlar tomonidan Nukus tumanida misni qayta ishlash va kabellar ishlab chiqarish loyihalari rejalashtirilgan.
Mazkur 124 ta loyiha natijasida 20 mingdan ortiq aholi ish bilan ta’minlanadi.
Prezident ishbilarmonlarga har tomonlama madadkor bo‘lib, loyihalarni jadallashtirish muhimligini ta’kidladi.
Bundan avval davlat rahbari Nukus Electroapparat qo‘shma korxonasi faoliyati bilan tanishgani haqida xabar berilgandi. O‘zbekiston prezidenti Qoraqalpog‘istonga tashrifi davomida IT va ijtimoiy soha obyektlarini ko‘zdan kechirishi, mahallalarda aholi hayoti bilan tanishishi ham rejalashtirilgan. Yangi majmualar ishga tushirilib, navbatdagi loyihalar boshlanadi.
Shavkat Mirziyoyev hududlarning ijtimoiy-iqtisodiy rivoji bilan tanishish, xalq bilan muloqot qilish maqsadida Qoraqalpog‘iston Respublikasiga so‘nggi marta 2023-yilning mart oyida borgandi. Tashrif davomida yangi korxonalar ishga tushirilib, respublikada sanoatni rivojlantirish yo‘nalishlari belgilandi. Davlat rahbari, shuningdek, yoshlar bilan muloqot qildi, mahallalardagi ishlarni ko‘zdan kechirdi hamda madaniy tadbirda ishtirok etdi.
Izoh (0)