Afrika qit’asidan tashqarida maymunchechak (Mpox) bilan kasallanishning birinchi holati aniqlandi. Kasallik Shvetsiyada qayd etildi. Bu haqda mamlakat sog‘liqni saqlash agentligi xabar berdi.
![](/static/2024/08/16/photo_2024-08-16_09-25-35-5fyXi3Lj.jpg)
“Stokgolmda tibbiy yordam so‘rab murojaat qilgan shaxsda clade I virusi (maymunchechak) tomonidan chaqirilgan chechak tashxisi qo‘yilgan”, deyiladi agentlik saytida.
Infeksiya xastalikka chalingan shaxsning maymunchechak keng tarqalgan Afrikaga tashrifida yuqqani aytilmoqda. Jahon sog‘liqni saqlash tashkiloti maymunchechak epidemiyasi bilan bog‘liq favqulodda holat eʼlon qilgan.
Bunga Afrika qitʼasining ayrim hududlarida maymunchechak bilan bog‘liq vaziyat nazoratdan chiqib ketgani sabab bo‘lgan. Hozirda Markaziy Afrika bo‘ylab bir nechta yangi epidemiya o‘choqlari paydo bo‘lgan. Kongo Demokratik Respublikasida kamida 450 kishi kasallikdan halok bo‘lgan.
JSST rahbari Tedros Gebreyesusning aytishicha, Afrika va undan tashqarida epidemiyaning tarqalish ehtimoli “juda xavotirli”. Zarur choralar ko‘rilmasa, maymunchechak Osiyo va Yevropa janubiga tarqalishi mumkin.
“Ushbu epidemiyani to‘xtatish va insonlar hayotini saqlab qolish uchun muvofiqlashtirilgan xalqaro javob zarur. Insoniyat bu epidemiyaga jiddiy qarashi kerak”, degan Tedros Gebreyesus.
Maʼlumot o‘rnida, maymunchechak virusi yaqin aloqa, masalan, jinsiy yaqinlik, teriga teginish va havo-tomchi usulida yuqishi mumkin. Kasallik virusi inson organizmida grippga o‘xshash simptomlarni, terining shikastlanishini keltirib chiqaradi. Har 100 nafar bemordan bittasida o‘lim holati kuzatilishi mumkin.
Izoh (0)