Meta kompaniyasi asoschisi, milliarder Mark Sukerberg rafiqasi Prisilla Changa bag‘ishlab yaratilgan haykalni sovg‘a qildi.
39 yoshli Prisilla Chan gavdalantirilgan 2 metrdan baland bronza haykalning muallifi amerikalik rassom va haykaltarosh Daniyel Arshamdir. U Snarkitecture dizayn byurosining asoschisi bo‘lib, avvalroq Tiffany & Co kabi mashhur brend bilan hamkorlik qilgan.
Haykaltarosh Prisillani shamolda hilpirayotgan va qanotga aylanayotgan kumush libosda tasvirlagan. Liverpul muzeyi veb-saytida ta’kidlanganidek, Rim davrida haykallar va byustlar ko‘pincha vafot etgan yaqinlarini ulug‘lash yoki “muhim ahamiyatga ega qarindoshlar”ni e’zozlash uchun yaratilgan.
Sukerberg rafiqasi va uning haykali surati tushirilgan postga:
“Ayollarga atab haykal o‘rnatish Rim an’anasini qaytarmoqdamiz”, deya izoh qoldirgan.
Mark Sukerberg va Prisilla Chan 2003-yilda talabalar kechasida tanishgan. Ularning ikkisi ham Garvardda tahsil olgan. 2012-yilda juftlik turmush qurdi: ular Prisillaning tibbiyot fanlari doktori darajasini olganini nishonlash maqsadida yaqinlarini chaqirdi, ammo mehmonlar Kaliforniyadagi er-xotinning uyi hovlisida paydo bo‘lganida ular aslida to‘yda qatnashayotganliklarini ma’lum qilishdi.
Uch yildan so‘ng Sukerberg va Chan Maksima ismli qiz farzandli bo‘lishdi. Er-xotinning yana ikki nafar farzandi — Avgusta va Aureliya ismli qizlari bor. Kenja farzand 2023-yilda tug‘ilgan.
Izoh (0)