Yaponiya poytaxti tomon halokatli “Ampil” to‘foni yaqinlashmoqda. Bu haqda mamlakat mahalliy nashrlariga tayanib, Reuters manbasi xabar berdi.
15-avgust kuni mamlakat sharqidagi suvlarda to‘fon ilk bor qayd etilgan. Oqibatda aviakompaniyalar yozgi sayohat mavsumining eng yuqori cho‘qqisida o‘z faoliyatining bir qismini cheklash va yuzlab reyslarni bekor qilishga majbur bo‘lgan.
Yaponiya meteorologiya agentligi (JMA) tomonidan “kuchli” deb tasniflangan to‘fon mamlakatning Tinch okeani sohillaridan taxminan 690 kilometr uzoqlikda shakllangan. Kuchli havo oqimlari tufayli “Ampil” sharqiy hudud bo‘ylab Yaponiya quruqligi tomon harakatlana boshlagan.
Yaponiya mahalliy manbalari tarqatgan xabarlarga ko‘ra, “Ampil” to‘foni soniyasiga 35 metrga yetishi mumkin. Maksimal shamol tezligi esa 50 metr sekund bo‘lishi taxmin qilingan.
“Ushbu to‘fon yaqinlashayotgani munosabati bilan biz jamoatchilikni bo‘ronlar, baland to‘lqinlar va kuchli yomg‘irlarga qarshi tayyor turishga chaqiramiz. Poytaxt va unga qo‘shni hududlarda favqulodda holat yuz berishi mumkin”, deyilgan Yaponiya meteorologiya agentligi xabarida.
Yaponiyaning asosiy Japan Airlines aviakompaniyasi 191 ta ichki va 26 ta xalqaro reyslarni favqulodda vaziyat sabab bekor qilishni rejalashtirgan. Boshqa bir ANA aviakompaniyasi ham 280 ta ichki reyslar kechiktirilishini eʼlon qilgan.
Yaponiyada “Ampil” to‘foni sabab temiryo‘llar faoliyati ham to‘xtatilishi aytilgan. Jumladan Tokio va Yaponiyaning sanoat markazi Nagoya o‘rtasidagi “Shinkansen” tezyurar poyezdining barcha qatnovlari to‘xtatilgan.
Izoh (0)