Turkmanistonning yagona mobil operatori SIM-kartalar sotuvini to‘xtatdi. Ularni 16 yoshga to‘lgan yangi foydalanuvchilar ham, operator xizmatlaridan uzoq vaqtdan beri foydalanayotganlar ham olishi mumkin emas.
Gap TMCell savdo belgisi ostida ishlaydigan “Oltin Asr” mobil operatori haqida ketmoqda. Kompaniya telefon raqamlari tanqisligiga duch kelgan, bu esa hatto endigina pasport olgan 16 yoshli fuqarolarga ham xizmat ko‘rsatishni rad etishga olib kelmoqda. Kompaniya yuzaga kelgan vaziyatga rasmiy izoh bermagan.
Hozircha mijozlar uchun mavjud yagona narsa bu — allaqachon mavjud bo‘lgan SIM-kartalardagi tarif rejasini o‘zgartirishdir. Mamlakatda 2022-yilgacha ota-onalar o‘z nomiga voyaga yetmagan bolalar uchun SIM-karta sotib olishi mumkin edi. Ammo bu ikki yildan ortiq vaqtdan beri ishlamayapti.
Turkmanistonda SIM-karta xaridi uchun bir qator protseduralardan o‘tish va hattoki navbatda ro‘yxatdan o‘tish kerak edi. Bir odam faqat bitta “simkarta” sotib olishi mumkin bo‘lgan.
Izoh (0)