Rossiya armiyasi 2022-yil fevralida Ukrainaga hujum boshlanganidan beri frontdagi yo‘qotishlarni to‘ldirishga ulgurmayapti. Bu haqda Kremlga yaqin uchta manba va Rossiya Mudofaa vazirligiga tayanib, Bloomberg xabar berdi.
![](/static/2024/08/15/photo_2024-08-15_09-21-54-kKZejsIV.jpg)
Manbalarga ko‘ra, shartnomali xizmatchilar uchun to‘lovlar sezilarli darajada oshganiga qaramay, Rossiya hududlari chaqiruv kvotalarining o‘rtacha uchdan bir qismidan ko‘prog‘ini bajarmayapti.
Rossiyaning Ukraina sharqida va janubida yuz minglab askarlari bor, u yerda janglar asosan boshi berk ko‘chaga kirib qolgan.
“Ammo Rossiya qurolli kuchlarining Kursk viloyatida Ukraina harbiylari hujumini qaytarishga va chegara ustidan nazoratni tiklashga qodir emasligi mudofaa zaxiralarining yetishmasligini ko‘rsatdi”, deb yozadi Bloomberg.
Yuzaga kelayotgan vaziyat Rossiya rasmiylarini yangi safarbarlik o‘tkazishga majbur qilishi mumkin, deydi agentlikning ikki manbasi. Bir amaldorning aytishicha, Kreml harbiylarga frontda dam berish uchun uni “rotatsiya” sifatida taqdim etishi mumkin. Boshqasining ta’kidlashicha, safarbarlik to‘g‘risidagi buyruq 2024-yil oxirida e’lon qilinishi kutilmoqda.
Rossiyada safarbarlik
2022-yil sentyabr oyida Rossiya prezidenti Vladimir Putin mamlakatda “qisman safarbarlik” e’lon qildi, uning doirasida 300 ming kishi armiyaga chaqirildi. Oktyabr oyi oxirida Putin safarbarlik tugaganini aytgan, ammo tegishli farmonni imzolamagan. O‘shandan beri hukumat bir necha bor Rossiyada yangi safarbarlik bo‘lmasligini e’lon qildi. Oxirgi marta Putin bu haqda 2024-yil iyun oyida gapirgan edi. Ukraina Qurolli kuchlarining Kursk viloyatiga bostirib kirishi fonida u Rossiya Mudofaa vazirligi bilan shartnomalar tuzishni xohlovchilar soni ko‘payganini aytdi.
Izoh (0)