Rossiya kuchlari 14-avgust kuni Ukrainaning Odessa portidagi infratuzilmaga raketalar bilan zarba bergan. Bu haqda Reuters nashri mahalliy ukrain manbalariga tayanib, xabar berdi.
Manbada aytilishicha, hujum seriyali va yalpi tarzda amalga oshirilgan. Raketalar kelib urilishi hamda port hududida portlashlar yuz berishi oqibatida muassasa xodimlaridan ikki nafari voqea joyida halok bo‘lgan.
Ukraina Bosh prokuraturasi ham hujum sodir bo‘lganini tasdiqlagan. Vayron qilingan port infratuzilmasida o‘rganishlar olib borilayotgani va portlatilgan raketalar turi aniqlanayotgani xabar berilgan.
Odessa gubernatori Oleg Kiper hujum yuzasidan qisqa bayonot eʼlon qilgan. Unda aytilishicha, Odessa porti hududi ballistik raketa bilan nishonga olingan. Portlash hududidan topilgan birlamchi dalillar shunga ishora qilgan.
Manbaga ko‘ra, Rossiya o‘tgan yili yozda Ukraina g‘allasining mamlakatdan tashqariga xavfsiz yetkazib berilishini kafolatlagan BMT vositachiligidagi kelishuvdan chiqqanidan beri Ukraina port infratuzilmasiga tez-tez hujumlar sodir etilgan. Bu esa dengiz savdo yo‘lagini xavfli yo‘nalishga aylantirgan.
Tahlilchilar Odessaga hujumni Rossiya tomonidan janubiy frontga yurish qilinishiga ishora sifatida qabul qilgan. Rus qo‘mondonligi Odessaga hujumni tasdiqlagan bo‘lishi mumkinligi aytilgan.
Maʼlumotlarga ko‘ra, so‘nggi 24 soatda Kursk, Pokrovsk va Donetsk yo‘nalishlarida rus va ukrain bo‘linmalari bir-biriga o‘q uzishi holatlari ko‘paygan. Ikki tomonning mudofaa chizig‘ini yorib o‘tishga urinishlari kuchaygan.
Izoh (0)