“Barselona”ning yosh yulduzi Lamin Yamalning otasi Munir Nasraui pichoqlangan holda shifoxonaga yetkazildi.
Relevo bergan ma’lumotlarga ko‘ra, unga allaqachon ruxsat berilgan va hozirda uning hayoti xavf ostida emas.
Hodisaning aniq tafsilotlari oshkor etilmagan, biroq baʼzi ispan OAVlari Barselonaning Mataro chekkasidagi avtoturargohda sodir bo‘lgan mojaro haqida turli versiyalarni aytmoqda.
Politsiya bir nechta guvohlarni topishga muvaffaq bo‘ldi. Hujum oldidan bir nechta noma’lum shaxslar va Laminning otasi ishtirokida mojaro yuz berib mushtlashuv sodir bo‘lgan. Mojaro Munir iti bilan yurganida boshlangan: uni haqorat qilishgan va balkondan suv sepishgan. Voqea mushtlashuvga aylanib ketgan va Yamalning otasiga pichoq bilan hujum qilingan.
Internetda Yamalning otasi va qo‘shnilari o‘rtasida sodir bo‘lgan janjal aks etgan videolar tarqaldi. Bu yerdagi janjal ham mushtlashuv bilan yakun topishi mumkin edi, biroq voqea joyiga politsiya yetib kelgan.
Eslatib o‘tamiz, 17 yoshli Yamal “Barselona” tarbiyalanuvchisi bo‘lib, akademiyadan asosiy jamoaga qo‘shilgan. Futbolchining klub bilan shartnomasi 2026-yilning yoziga qadar mo‘ljallangan. Transfermarkt ispaniyalik futbolchini 120 million yevroga baholamoqda.
O‘tgan mavsumda Yamal 50 ta o‘yin o‘tkazib, 7 ta gol urdi va 9 ta golli uzatmani amalga oshirdi.
2024-yilgi Yevropa chempionatida yosh vinger yettita o‘yinning barchasida qatnashib, bitta gol urdi va to‘rtta golli uzatmani amalga oshirdi.
Izoh (0)