Barselonadagi ISGlobal instituti tomonidan Nature Medicine jurnalida chop etilgan tadqiqotga ko‘ra, 2023-yilda Yevropada 47 690 nafar kishi issiqdan vafot etgan.
2023-yil so‘nggi o‘n yillikdagi issiqdan o‘limlar soni bo‘yicha ikkinchi o‘rinni egallagan. Birgina 2022-yilning o‘zida bu 60 ming nafardan ortiq o‘lim qayd etilgan.
Jazirama tufayli Gretsiyada bir million aholiga 393 ta o‘lim to‘g‘ri kelgan bo‘lsa, Bolgariyada ushbu ko‘rsatkich 229 ta, Italiyada 209 ta va Ispaniyada 175 tani tashkil etgan. Tadqiqotchilar 2023-yilda rekord darajadagi eng issiq yil bo‘lganini ta’kidlagan.
Hujjatda aytilishicha, tadqiqotda Yevropaning 35 ta mamlakatidagi harorat va o‘lim ko‘rsatkichlari tahlil qilingan. Xabar qilingan o‘limlarning yarmidan ko‘pi 2023-yil iyul o‘rtalaridan avgustgacha bo‘lgan issiqlik to‘lqinlari paytida sodir bo‘lgan. Xususan, o‘sha yilning 18-iyulida Sitsiliyada 44 daraja issiq qayd etilgan va Gretsiyada o‘rmon yong‘inlari avj olib, bir necha kishining hayotiga zomin bo‘lgan edi.
Tadqiqot mualliflarining ta’kidlashicha, sog‘liqni saqlashni yaxshilash, erta ogohlantirish tizimlari, aloqani yaxshilash va mehnatni muhofaza qilish sohasidagi taraqqiyot kabi hukumat moslashuv choralarisiz bunday o‘limlar soni 80 foizga ko‘p bo‘lishi mumkin edi.
Izoh (0)