Samarqand viloyatining Jomboy va Namangan viloyatining Uychi tumanlarida elektr tarmoqlariga noqonuniy ulanish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Jomboy tuman bo‘limi tomonidan o‘tkazilgan tergovga qadar tekshiruvda “B.K.” MCHJ ish boshqaruvchisi I.P. quvvati 12 kVt/soat bo‘lgan suv nasosini elektr tarmog‘iga to‘g‘ridan to‘g‘ri yashirin yo‘llar bilan ulab, jami 121,1 mln so‘mlik elektr energiyasidan noqonuniy foydalanib kelgani aniqlangan.
Shu kabi, departamentning Uychi tuman bo‘limi tomonidan o‘tkazilgan tergovga qadar tekshiruvda fuqaro I.O. umumiy ovqatlanish shoxobchasi sifatida foydalanib kelayotgan noturar binoda umumiy foydalanishdagi elektr tarmog‘iga o‘zboshimchalik bilan ulanib, jami 97,6 mln so‘mlik elektr energiyasidan noqonuniy foydalanib kelgani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)