Rossiyada harbiy sirlarni Ukrainaga sotgan armiya okrugi xodimi qo‘lga olindi. Bu haqda The Moscow Times nashri xabar bergan.
Manbada aytilishicha, Rossiya Federal xavfsizlik xizmati harbiy maʼlumotlarning xorijga uzatilishi yuzasidan maxsus operatsiya o‘tkazgan. Operatsiyada harbiy okrugda faoliyat olib boruvchi ayol hibsga olingan.
Hibsga olingan ayol Rossiya arsenallari, harbiy bazalari, omborlari joylashuvi va zaxirasi haqidagi maʼlumotlarni Kiyevga uzatgani aniqlangan. Bu maʼlumotlar esa Ukrainaga maxsus operatsiyalar tashkil etishga yordam bergan.
Hibsdagi shaxs Rostov-Don shahrida yashab kelgan. U 2023-yilning yanvar oyida Janubiy harbiy okrugdagi bo‘linma tarkibiga qo‘shilgan. Bo‘linmada maxfiy harbiy maʼlumotlar bilan ishlab kelgan.
Rasmiylar ayolning ism-sharifi va lavozimini oshkor qilmagan. Ayol ayni paytda qayerda saqlanayotgani ham ma’lum qilinmagan. Rasmiylar birinchi sudga qadar tergov davom etayotganini bildirgan.
Ayol Ukraina maxsus xizmatlari bilan qay tarzda aloqa o‘rnatgani hozircha maʼlum emas. So‘nggi haftalarda u Kiyev harbiylari bilan Rossiyada taqiqlangan “Signal” xabar almashish ilovasi orqali bir necha bor gaplashgan.
“U to‘plangan maʼlumotlarni messenjer orqali aloqa qilish vaqtida tashqi razvedka xizmatiga o‘tkazib bergan. Yuborilganlar taqiqlangan maʼlumotlar bo‘lgan”, deyiladi Rossiya Federal xavfsizlik xizmati xabarida.
Ayolning sodir etgan ishi bilan bog‘liq tergov davom etayotgani xabar qilingan. Agar u davlatga xiyonat qilganlikda ayblansa, 25 yilgacha qamoq jazosiga hukm qilinishi mumkin.
Izoh (0)