Yoz fasli ham o‘z nihoyasiga yetib bormoqda, siz esa hali ham ozishga ulgurmadingizmi? Hechqisi yo‘q, tanangiz va sog‘lig‘ingiz haqida qayg‘urish uchun ma’lum vaqtni kutish shart emas. Sport bilan shug‘ullanishni yilning istalgan vaqtida boshlash mumkin.
Agar birinchi martasi ozishni maqsad qilgan bo‘lsangiz, ortiqcha charchatmaydigan, ammo samara beradigan ozish metodlaridan boshlashingiz mumkin. Masalan, endokrinolog Yuliya Pautova ishni toza havoda yurishdan boshlashni maslahat beradi. Asta-sekin bu odat tusiga kiradi va qo‘shimcha mashqlarni bajarish qiyin bo‘lmaydi.
“Sport bilan shug‘ullanishni odatiy tezlikda uzoq masofaga yurish, badantarbiya va nafas olish mashqlaridan boshlang. Agar sport zaliga borishni istasangiz, malakali trenerni topish lozim, u sizga mos bo‘lgan dasturni ishlab chiqadi”, deya tushuntirdi shifokor.
Toza havoda yurishning yana bir foydasi kisloroddir. Mutaxassisning fikriga ko‘ra, toza havodagi mashg‘ulotlar bino ichidagi mashqdan ko‘proq samara beradi.
“Hatto ofis xodimi bo‘lsangiz ham biror jismoniy harakat qilish uchun imkon topishga urining. Masalan, ishga borish va qaytishda 2 bekat avvalroq yo‘lda tushib qoling va qolgan masofani piyoda bosib o‘ting, lift o‘rniga zinapoyalardan foydalaning, kompyuterda ishlash vaqtida har soat 5 daqiqaga tanaffus qiling, ertalab va kechqurun nafas olish mashqlarini bajaring.
Asosiysi, har qanday harakatga ustunlik berishdir. Ko‘p odamlar vazn tashlash jarayoni uchun kislorod qanchalik muhim ekanligini bilmaydi. Shuning uchun ozish uchun ko‘proq ochiq havoga chiqish muhimdir”, deydi mutaxassis.
Uyqu rejimi ham qomatga ta’sir qiladi. Endokrinolog-diyetologning aytishicha, uyquga kech yotish odati ortiqcha vaznning ortishiga olib kelishi mumkin.
Tana vaznini normallashtirish insonning sirkad ritmini tiklashdan boshlanadi. 2-4 soat davom etadigan ushbu sikl barcha ichki a’zolar faoliyatini boshqaradi. Ya’ni, ozish uchun qilingan mashqlar erta uyquga yotish odatini shakllantirish orqali yaxshiroq samara beradi.
“Ortiqcha vazndan xalos bo‘lish istagidagi bemorlarga soat 23:00 dan avval uxlash tavsiya qilinadi. Ideal holda soat 10 da uyquga ketish zarur. Chunki soat 21 dan 23 gacha melatonin gormoni ishlab chiqariladi. U ko‘plab metabolik jarayonlar uchun javobgar bo‘lib, “yoshlik gormoni” deb ham ataladi. Barvaqt uyqu ayniqsa qorin sohasidagi yog‘lardan xalos bo‘lishga ko‘mak beradi”, deydi Yuliya Pautova.
Izoh (0)