Rossiya hukumati Ukraina hujumi sabab Belgorod viloyatidan ham aholini evakuatsiya qilishni boshladi. Bu haqda Rossiya mahalliy nashrlariga tayanib, Reuters nashri xabar berdi.
Manbada aytilishicha, Kurskka kirib olgan Ukraina bo‘linmalari endilikda unga qo‘shni Rossiya hududlariga ham tahdid sola boshlagan. Buning oqibatida markaziy hukumat qo‘shimcha evakuatsiya rejasi ishlab chiqishga majbur bo‘lgan.
Ukraina bilan chegaradosh va bevosita Ukraina askarlari janglar olib borayotgan Kursk viloyatiga qo‘shni bo‘lgan Belgorodda ham xavfsizlik bilan bog‘liq vaziyat yomonlashgan. Viloyatga ikki tomonlama hujum uyushtirilishi mumkinligi borasida norasmiy xabarlar tarqala boshlagan.
Belgorod viloyati gubernatori Vyacheslav Gladkov Krasnaya Yaruga tumani chegarasida Ukraina armiyasining shubhali manyovrlari kuzatilganini xabar bergan. Kiyev Belgorodda Kurskdagi kabi operatsiya amalga oshirishi xavfi mavjudligi sabab aholini zudlik bilan ko‘chirish boshlangan.
“Ishonchim komilki, harbiylarimiz yuzaga kelgan tahdidni yengish uchun hamma narsani qiladilar. Biz Krasnaya Yaruga tumanida yashovchi odamlarni xavfsiz joylarga ko‘chirishni boshlaymiz”, degan Belgorod gubernatori Gladkov.
Maʼlumotlarga ko‘ra, Rossiya Kursk, Bryansk va Belgorod viloyatlarida keng qamrovli xavfsizlik rejimini joriy qilgan. Havo hujumiga qarshi qo‘shimcha mudofaa tizimlari joylashtirilgan.
Rossiya rasmiylari Belgorod viloyatidan qancha tinch aholi vakili evakuatsiya qilinishini maʼlum qilmagan. Favqulodda ko‘chirish rejasi hozircha faqat Krasnaya Yaruga tumanida amalga oshirilishi eʼlon qilingan.
Izoh (0)