“Qo‘rg‘on sirlari”dan keyin nima tomosha qilsa bo‘ladi: ekran qarshisiga mixlab qo‘yadigan ajoyib turk seriallari

So‘nggi yillardagi yorqin turk serialining ikkinchi fasli — “Qo‘rg‘on sirlari” nihoyasiga yetdi. Loyihaning kelajakdagi taqdiri haqidagi yangiliklarni kutish bilan birga undan qolishmaydigan darajada qiziqarli bo‘lgan quyidagi seriallarni tavsiya qilamiz.

“Soxta muhabbat”

Serialda “Nafratdan sevgigacha...” formulasidan foydalaniladi. “Qo‘rg‘on sirlari” muxlislari uchun yoqimli xabar: rollardan birini bosh qahramon Seyranning opasi roli bilan tanilgan Beril Pozam ijro etadi. Serialda yirik to‘qimachilik kompaniyasi xodimi Ayshe (Burju O‘zberk) haqida hikoya qilinadi. Otasining o‘limidan so‘ng, qiz onasi va uni sevmagan odamiga turmushga berish niyatida bo‘lgan qattiqqo‘l akalari bilan yashaydi. Ayshe bunday hayotga chidashni istamay, taqdirini o‘z qo‘liga oladi va tikuvchilik firmasi merosxo‘ri Keremga (Chag‘lar Ertug‘rul) soxta nikoh tuzishni taklif qiladi.

“Dilemma”

Tobora ommalashib borayotgan detektiv psixotriller Amerikaning mashhur “Tonggi shou” uslubida suratga olingan. Serialda bosh rolni “Muhtasham yuz yil” filmi yulduzi Berguzar Korel, ikkinchi darajali rollardan birini tomoshabinlarga “Qo‘rg‘on sirlari”dagi Seyranning otasi roli bilan tanish bo‘lgan Diren Po‘latog‘ullari ijro etadi. Mashhur teleboshlovchi Neslihan Turxon jonli efirda jinoyatlarni tergov qilmoqda. Jurnalist o‘zining murosasiz, xolis va adolatparvarligi uchun qadrlanadi. Ammo bir kuni uning obro‘siga putur yetadi — yagona o‘g‘li Jan (Kaan Mirach Sezen) bir talabani o‘ldirishda gumon qilinadi. Neslihan oldida qiyin vazifa turibdi — u uchun nima muhimroq ekanligini hal qilish: burchmi yoki oila.

“Begonalar sirlari”

Serial voqealari yuqori jamiyat vakillari, ularning qarindoshlari va xizmatkorlari yashaydigan Istanbulning chekka hududida bo‘lib o‘tadi. Mashhur shifokor oilasida xizmatkor bo‘lib ishlagan Meryemning to‘satdan vafot etishi hammani larzaga soladi. Sirli o‘lim sabablariga hali oydinlik kiritilmagan. O‘lim tafsilotini ochish uchun jurnalist Qahraman Demir ishga aralashadi, ammo xizmatkorlar bu voqeadan chetda qolishni ma’qul ko‘rishadi, chunki ular xo‘jayinlarining boshqa sirlarini ham bilishadi.

“Yangi hayot”

Baxtsiz hodisa sabab maxsus kuchlar askari Adem (Serkan Chayo‘g‘lu) harbiy xizmatdan ketishga majbur bo‘ladi. Endi u oilasini boqish uchun zudlik bilan biror joyda ish topishi kerak. To‘satdan u uchun yaxshi taklif chiqadi: mashhur oligarxning xotinini himoya qilishi kerak. Go‘zal Yasmin (Melisa Asli Pamuk) yangi tansoqchisidan unchalik mamnun emas. Ikkalasi ham bu uchrashuv ularning hayotini butunlay o‘zgartirishini hali bilmaydi.

“Qog‘oz uy”

Helin Jandemir, Nur Fettaho‘g‘lu va Erdal Beshikchio‘g‘lu ishtirok etgan birgina xato bir necha kishining taqdirini qanday buzishi haqida shafqatsiz drama. Injiq Jemre — dadasining erka qizi. 16 yoshli maktab o‘quvchisi uchun hamma narsa muhayyo. Biroq bir kunda qizning otasi haqidagi fikri butunlay o‘zgarib ketadi. Telefon suhbatidan ma’lum bo‘lishicha, otasi onasiga xiyonat qilyapti. Uyidagi xizmatkor ayolni otasining ma’shuqasi deb o‘ylagan Jemre og‘ir jinoyatga qo‘l uradi. Tajribali advokat hisoblangan ota-onasi har qanday holatda ham qizi qamalmasligiga harakat qiladi.

“Yeshilcham”

“Qo‘rg‘on sirlari” yulduzi Afra Sarachog‘lu ishtirok etgan muhabbat haqidagi serial. Istanbul, 1960-yillar. Yosh va ambitsiyali prodyuser Semih Atesh (Chag‘atay Ulusoy) biznes sherigining xiyonati tufayli mashhur Yeşilçam kinostudiyasida ishidan ayriladi. Karyerasini saqlab qolish uchun Ateshning birgina yo‘li bor: hech kimnikiga o‘xshamagan blokbaster suratga olishi kerak. Shuningdek, tan olinishi va muvaffaqiyatga erishishi uchun qahramon kino sanoatida to‘lib-toshgan ko‘plab tuzoqlarni yengishi kerak bo‘ladi.

“Birinchi va oxirgi”

Butun bir oilaning alamli parchalanishi haqidagi achchiq hikoya. Deniz (O‘zge O‘zpirinchi) va Barish (Salih Bademchi) 10 yildan beri birga yashaydi, lekin endi ular baxtni his qilishmaydi. Cheksiz janjallar, tanbehlar va bir-birlarini eshita olmaslik er-xotinlarning ajrashish uchun ariza berishlariga olib keladi. Bu qaror ularning yosh o‘g‘liga yomon ta’sir ko‘rsatadi. Qahramonlar vasiylik masalalari haqida bahslashayotgan bir paytda tomoshabinlar sobiq juftlikning munosabatlari tarixini tomosha qilishadi: yorqin tanishuvdan tortib hamma narsa parchalana boshlagan fojiali daqiqagacha.

“Bonkis”

Har qanday vaziyatda ham o‘ziga ishonish haqidagi hayotiy komediya. Muvaffaqiyatsiz munosabatlardan so‘ng, Denis (Deniz Tezuysal) o‘ziga vaqt ajratishga qaror qiladi. U arxitektura byurosidagi ishidan ketadi va o‘z kafesini ochadi. To‘g‘ri, ishi birdaniga yurishib ketmaydi. “Bonkis”ning bir nechta mijozlari deyarli hech qanday daromad keltirmaydi, bundan tashqari, Denisning ota-onasi uning biznesiga jiddiy qarashmaydi. Muvaffaqiyatsizlik ketidan muvaffaqiyatsizlik qizni ta’qib qiladi, lekin u orzusi bilan xayrlashishni istamaydi.