Pensiya jamg‘armasi fuqarolarga pensiyani rejalashtirish bo‘yicha tavsiyalar berdi.
Jamg‘arma hozirda aksariyat odamlar o‘z kelajagiga eʼtiborsiz qarab, pensiya yoshiga yetganda afsuslanib qolayotganini maʼlum qildi. Buning asosiy sababi ish stajini yetishmasligi, oylik maosh miqdorining kamligi bilan izohlanadi.
Jamg‘arma fuqarolar o‘zi uchun qulay va moliyaviy barqaror keksalikni taʼminlashda imkon qadar erta harakat boshlash lozimligini eslatdi.
“Pensiyani rejalashtirish moliyaviy rejalashtirishning asosiy jihati hisoblanadi. Bu fuqarolarga nafaqat keksalikda moliyaviy yordam beradi, balki kelajakka ishonch bag‘ishlaydi”, deyiladi manba izohida.
Jamg‘armaga ko‘ra, pensiyani samarali rejalashtirishning bir qator usullari mavjud.
Birinchidan, fuqarolar doimiy ish stajiga ega bo‘lish uchun rasmiy daromad keltiradigan korxona, tashkilot yoki muassasalarida mehnat shartnomasiga asosan faoliyat yuritishi kerak.
Ikkinchidan, norasmiy ravishda mehnat faoliyati yuritayotgan fuqarolar o‘zini o‘zi band qilgan holda muntazam ravishda ijtimoiy soliqlarni to‘lash orqali ish stajiga ega bo‘lib borishi lozim.
Uchinchidan, pensiya qonunchiligiga oid maʼlumotlar bilan muntazam ravishda xabardor bo‘lish zarur.
To‘rtinchidan, rasmiy olayotgan ish haqiga eʼtibor qaratish kerak. Bunda, pensiya yoshiga yetgunga qadar oxirgi o‘n yillik mehnat faoliyatidagi oylik ish haqlaridan pensiya hisoblanishini inobatga olish muhim.
Beshinchidan, fuqarolar ish beruvchilaridan o‘z ish staji to‘g‘risidagi maʼlumotlarini raqamlashtirishni talab qilishlari, mehnat faoliyati yuritmayotgan fuqarolar esa Bandlik bo‘limlariga mehnat daftarchalaridagi maʼlumotlarini raqamlashtirishni so‘rab murojaat qilishlari lozim. Shunda o‘z maʼlumotlarini One-ID orqali ko‘rish mumkin bo‘ladi.
Jamg‘arma fuqarolar shunday tartibda mehnat faoliyatini olib borsa, ular pensiya yoshiga yetganda, qilgan mehnati evaziga davlat tomonidan moliyaviy taʼminot kafolatlanadi.
Izoh (0)