O‘zbekistondagi mahallalarda aholi muammolarini aniqlashning yangi tizimi joriy etiladi

Vazirlar Mahkamasining “Mahallalarda aholi muammolarini aniqlash tizimini takomillashtirish chora-tadbirlari to‘g‘risida”gi qarori qabul qilindi.

Qaror bilan 2024-yil 1-oktyabrdan boshlab mahallalarda fuqarolarning ijtimoiy-iqtisodiy muammolari yagona savolnoma asosida birlamchi o‘rganiladi. Yagona savolnoma asosida aniqlangan muammolar “Raqamli mahalla” platformasida shakllantiriladi hamda “mahalla yettiligi”ning tegishli elektron platformalariga fuqaro bilan individual tartibda ishlash uchun buyurtma shaklida yuboriladi.

Yagona savolnoma asosida shakllantirilgan buyurtmaga muvofiq “mahalla yettiligi” tomonidan fuqarolarning muammolari atroflicha o‘rganiladi, tahlil qilinadi va zarur choralar ko‘riladi.

Hujjat bilan Yagona so‘rovnoma asosida fuqarolarning ijtimoiy-iqtisodiy muammolarini aniqlash va hal qilish tartibi to‘g‘risidagi nizom tasdiqlandi.

U quyidagilarni belgilaydi:

• yagona so‘rovnoma asosida aholining ijtimoiy-iqtisodiy muammolarini aniqlash va bartaraf etish bo‘yicha mas’ul davlat organlari va tashkilotlarning majburiyatlari;
• so‘rovlarni o‘tkazish bosqichlari va usullari;
• “mahalla yettiligi” reytingini yuritish va “Raqamli mahalla” platformasida ishlash tartiblari.

Fuqarolar muammolarini yagona so‘rovnoma yordamida o‘rganish quyidagi hollarda tashkil etiladi:

• fuqaroning murojaati asosida;
• “eshikma-eshik” yurish natijalari bo‘yicha;
• boshqa fuqarolarning shaxsning ijtimoiy-iqtisodiy yordam (xizmat)ga ehtiyoji to‘g‘risida xabar berishi.

Yagona savolnomaga asosan birlamchi o‘rganish natijasida fuqaroda muammo yoki yordamga muhtojligi aniqlanmasa, fuqaroni o‘rganish ishlari shu bosqichninng o‘zida yakunlanadi. Bunda yagona savolnomaga asosan birlamchi o‘rganish o‘tkazishga fuqaro tomonidan rozilik bildirilmagan taqdirda, yagona savolnoma bo‘yicha o‘rganish o‘tkazilmaydi.

Yagona savolnoma asosida mahallada ijtimoiy himoyaga muhtoj aholi muammolarini aniqlash tizimini yo‘lga qo‘yish “Aholiga ijtimoiy xizmatlar va yordamlar ko‘rsatish tizimini yanada takomillashtirish chora-tadbirlari to‘g‘risida”gi prezident qarorida belgilangandi.