“Seni keyingi hafta dafn etishadi”: Isroilda aholiga tahdidli SMS-xabarlar yuborilmoqda

Isroilliklar ommaviy tahdidli SMS-xabarlar haqida shikoyat qilib, politsiyaga murojaat qilishdi. Bu haqda The Jerusalem Post nashri xabar qildi.

Ma’lumotlarga ko‘ra, odamlarning telefonlariga ularning haqiqiy ismlari, manzillari va “Keyingi haftagacha dafn etilasiz” deyilgan SMS-xabarlar kelgan.

Isroil politsiyasi mazkur faktni tasdiqladi va aholidan hech qanday munosabat bildirmaslikni, iloji bo‘lsa, xabar yuborilgan raqamni bloklashni so‘radi.

Yaqin Sharqdagi keskinlashuvning navbatdagi bosqichi Tehronda HAMAS siyosiy byurosi rahbari Ismoil Haniyaning o‘limi va Bayrutda “Hizbulloh” harakati harbiy qanoti qo‘mondonlaridan biri Fuad Shukrning o‘ldirilishidan so‘ng sodir bo‘ldi.

Eron, HAMAS va “Hizbulloh” voqeada Isroilni aybladi va buni javobsiz qoldirmasliklarini bildirdi.