Xorazm viloyatining Gurlan tumanidagi g‘isht ishlab chiqarish zavodida 4,7 mlrd so‘mlik elektr energiyasi o‘g‘rincha foydalanilgani aniqlandi.
Bosh prokuratura matbuot xizmatining ma’lum qilishicha, holat energiya resurslarni talon-toroj qilinishini fosh etishga qaratilgan nazorat tadbirlari davomida aniqlangan.
Gurlan tumanidagi “X.Sh.” MCHJ rahbari E.S. jamiyatga qarashli g‘isht ishlab chiqarish zavodidagi hisobga olish uskunasi ulanish sxemalarini o‘zgartirish yo‘li bilan tashqari ta’sir ko‘rsatib, 4 milliard 786 million so‘mlik (5 million 318 ming kVt./soat) elektr energiyasini o‘g‘irlagan.
Mazkur holat yuzasidan E.S.ga nisbatan Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik) bilan jinoyat ishi qo‘zg‘atilib, gumonlanuvchi shaxs protsessual tartibda ushlangan.
Jinoyat kodeksida bunday jinoyat uchun 8 yildan 15 yilgacha ozodlikdan mahrum qilish jazosi belgilangan.
“O‘zenergoinspeksiya” matbuot xizmati bergan ma’lumotga ko‘ra, so‘nggi bir oyda energiya resurslaridan noqonuniy foydalanishlar natijasida davlat manfaatlariga 234 milliard 778 million so‘mlik zarar yetkazildi.
Avvalroq Samarqandda 1,1 milliard so‘mlik elektr energiyasidan noqonuniy foydalangan g‘isht zavodiga jinoyat ishi qo‘zg‘atilgani, Sirdaryoda 491 million so‘mlik elektr energiyasidan noqonuniy foydalangan fermer xo‘jaligi rahbari ushlangani haqida xabar berilgan edi.
Izoh (0)