Bugungi kunda sog‘lom bo‘lish uchun sport markazlariga borib, trener ko‘rsatmasiga binoan mashq bajarishga intilishadi. Aslida salomatlik uchun toza havo va manzarali joylarda sayr qilish, piyoda yurish va yugurish koni foydadir.
Olimlarning aniqlashicha, toza havoda sayr qilish va tabiat haqida fikr yuritish sport zalidagi mashaqqatli mashg‘ulotlardan ko‘ra foydaliroqdir. Kuniga 40-45 daqiqa tez yurish 60 yoshdan oshgan odamlarda fikrlash qobiliyatini yaxshilaydi. Quyida sport zalga borishdan ko‘ra piyoda yurishning bir nechta afzalliklarini ko‘rib chiqamiz.
Maxsus sport uskunasi sotib olishning hojati yo‘q
Poyida yurishning hamyoningizga ham foydasi bor — ushbu mashg‘ulot uchun maxsus uskuna xarid qilish shart emas. Asosiysi, sizga qulay bo‘lgan bir juft yaxshi krossovka bo‘lsa bas. Shu bilan birga, piyoda yurish tanani faol sport kabi zo‘riqtirmaydi. Uzoq yo‘l yurgandan so‘ng tanada hech qanday o‘zgarish bo‘lmagandek tuyulishi mumkin, ammo natija bir necha haftada sezilarli bo‘ladi va o‘zingizni tetikroq his eta boshlaysiz.
Organizmning umumiy tiklanishi
Piyoda yurish tomirlar qon oqimining jadalroq harakat qilishiga yordam beradi, natijada barcha organlar kerakli miqdorda kislorod bilan to‘yinadi. Kechqurun yurishni odatga aylantirgan shaxslarda tez orada umumiy ahvoli yaxshilanadi: avval bosh og‘rig‘i, ma’lum muddatdan keyin bo‘g‘imlardagi og‘riqlar yo‘qoladi. Chunki uzoq yurish natijasida qon aylanishi qattiqlashib qolgan mushaklarni yengillashtirishga yordam beradi.
Yaxshi uyqu
Piyoda yurish uyqu sifatini yaxshilashga ko‘maklashadi. Agar siz uyqusizlikdan aziyat cheksangiz, kechqurungi sayr bundan xalos etishi mumkin. Uyquga ketishdan avval toza havodan to‘yib nafas olish, hatto oddiy shahar parkida aylanish tana o‘zini yengil his qilishi va bo‘shashi uchun foydalidir. Kislorod bilan to‘yingan organizm esa uyqu chaqiradi.
Sport zali haqida unutish mumkin
Muntazam piyoda yurish haftasiga bir necha martalik sport zalidagi mashg‘ulotlar o‘rnini bosishi mumkin. Piyoda sayr qilish — bu vazn tashlashning isbotlangan turi bo‘lib, har qanday yoshdagi insonlar uchun mos keladi. Yurish yugurish kabi samarali hamda sog‘liq uchun ancha xavfsizroqdir. Ertalabki mashg‘ulotlar sizni energiya bilan to‘ldiradi, kechki mashg‘ulotlar esa ishtahangizni jilovlaydi. Asosiysi, piyoda yurish mashqini muntazam bajarish kerak.
A’lo kayfiyat
Yurish nafaqat jismoniy, balki ruhiy holatingizga ham foydalidir. Sayr qilish baxt gormonlari — endorfin ishlab chiqarishni rag’batlantiradi. Agar yaqin insonlar va do‘stlar bilan birga sayr qilsangiz, kayfiyatingiz bir necha barobar oshganini his qilasiz.
Miya faoliyatini yaxshilash
AQShning keksayish muammolari bo‘yicha milliy kengashi mutaxassislari kuniga 40-45 daqiqa tez yurish 60 yoshdan oshgan odamlarda fikrlash qobiliyatini yaxshilashini aniqladi, chunki bunday jismoniy faollik miyada qon aylanishini yaxshilaydi. Yotishdan oldin sayr qilishni yaxshi ko‘radigan yoshlar kelajakda miya faoliyati bilan bog‘liq muammolarni shu tarzda oldini olishlari mumkin.
Umrni uzaytirish
Kuniga uch kilometrdan ortiq masofani bosib o‘tgan shaxslarda bevaqt o‘lim xavfi sezilarli darajada kamayishi isbotlangan. Umringizni uzaytirish uchun siz mazali taom va ichimliklardan voz kechishingiz bilan birga har kuni yurishni odatga aylantirishingiz lozim.
Izoh (0)