Avgust oyida ota-onalarni o‘ylantiradigan eng katta muammo albatta maktab bozori bilan bog‘liq. Ularning oldida o‘quv qurollari-yu maktab formasini xarid qilish masalasi ko‘ndalang turadi.
Xo‘sh, bugun maktab bozorlarida narx-navo qanday? Ota-onalar kerakli “kitob-daftarlar” uchun qancha mablag‘ sarflamoqda? Sizni Toshkentdagi Chilonzor buyum bozori misolida o‘quv qurollari narxi bilan tanishtiramiz.
Bozordagi mijozlardan so‘rovnoma o‘tkazilganda, bu yilgi maktab bozoridagi narx-navo hamyonbopligini aytganlar ham, qimmatligidan noliganlar ham bo‘ldi.
![](/static/2024/08/09/photo_4_2024-08-09_17-25-48-61INS2wK.jpg)
Ota-onalar maktab formasi uchun 300 mingdan 1 million so‘mgacha sarflashini aytdi. O‘rtamiyona xarajat qilinganda, 500-600 ming so‘m mablag‘ ketgan.
O‘quv qurollariga esa 80 mingdan boshlab 500 ming so‘mgacha sarflanayotgani ma’lum bo‘ldi.
![](/static/2024/08/09/photo_2_2024-08-09_17-25-48-X8mugWMz.jpg)
Savdo rastalarining birida o‘quv qurollarining narxi sotuvchilar tomonidan quyidagicha belgilangan:
- 12 varaqli daftar — 500 so‘mdan 650 so‘mgacha;
- 36 varaqli daftar — 1500 so‘mdan 1800 so‘mgacha;
- 48 varaqli daftar — 1800 so‘mdan 2200 so‘mgacha;
- 96 varaqli daftar — 3500 so‘mdan 4200 so‘mgacha;
- Ruchka — 800 so‘mdan 2000 so‘mgacha;
- Qora qalam — 800 so‘mdan 2000 so‘mgacha;
- Rangli qalamlar to‘plami— 8000 so‘mdan 20 000 so‘mgacha;
- Rasm daftar (albom) — 7000 so‘mdan 15 000 so‘mgacha;
- Daftar jildi to‘plami — 7500 so‘mdan 20 000 so‘mgacha;
- Karton qog‘oz — 15 000 so‘m;
- Maktab portfeli — 60 000 so‘mdan 150 000 so‘mgacha.
* narxlar o‘rta hisobda olingan
![](/static/2024/08/09/photo_3_2024-08-09_17-25-48-j1es6qui.jpg)
O‘zbekistonda 2024/2025-o‘quv yilida maktablarda o‘quvchilar uchun majburiy forma joriy etilmaydi. Bu haqda Maktabgacha va maktab ta’limi vazirligi boshqarma boshlig‘i Azamat Kamolov ma’lum qilgan.
2018-yil hukumat tomonidan yagona maktab formalari namunalari tasdiqlangan edi. 2018/2019-o‘quv yilidan boshlab o‘quvchilar uni ixtiyoriy tartibda kiyishga haqli ekani belgilab qo‘yilgan. Maktab formalari majburiy bo‘ladigan sana 2019/2020-o‘quv yilidan 2024/2025-o‘quv yiliga – 5 yilga kechiktirilgandi. Vazirlar Mahkamasining qaroriga tegishli tuzatishlar kiritilgan bo‘lib, yagona maktab formasi 2025-yilga qadar bosqichma-bosqich joriy etib borilishi belgilangan.
![](/static/2024/08/09/photo_1_2024-08-09_17-25-48-OXgf8ESo.jpg)
![](/static/2024/08/09/photo_2024-08-09_17-30-41-gr9VR3Si.jpg)
Xaridorlar orasida narx-navodan qoniqayotganlar talaygina. Hatto narxlar o‘tgan yilgidan arzonlashgani haqida aytilmoqda. Sotuvchilarning o‘zi farzandining o‘quv quroli uchun qancha mablag‘ ajratmoqda?
— “O‘zim sotuvchi bo‘lganim sababli tanishlardan narxlarni kelishtirib, farzandlarimga forma va o‘quv qurollari sotib olaman. Shunda o‘rtacha 1-1,5 million so‘m atrofida pul ketadi”, deydi kiyim-kechak sotuvchisi.
— “Narxlar o‘tgan yilgidan ancha pasaygan, talab tushgan, mijozlar kam. O‘zim farzandlarimga chidamli, sifatli kiyimlar xarid qilaman. Shunda har biriga 100 dollardan mablag‘ ketadi”, dedi maktab formasi bilan savdo qiluvchi suhbatdoshimiz.
![](/static/2024/08/09/photo_5_2024-08-09_17-25-48-b08UQWHu.jpg)
Videoni to‘liq holda quyidagi havola orqali tomosha qilishingiz mumkin.
Izoh (0)