AQSH davlat departamentining uch nafar aʼzosi “Tolibon” qo‘lida asirlikda qolmoqda. Bu haqda Afg‘oniston mahalliy nashrlari tarqatgan xabarlarga asoslanib, The Frontier Post xabar berdi.
Manbada aytilishicha, departament vakillari, AQSH fuqarolari Jorj Glezmann, Mahmud Habibi va Rayan Korbettlar “Tolibon” tomonidan qamoqda saqlanmoqda. AQSH tomoni ularni ozod qilish bo‘yicha Afg‘onistonga bir necha bor talab jo‘natgan. Biroq Kobuldagi hukumat talabni uzluksiz rad etib kelgan.
Afg‘onistonlik siyosiy tahlilchi Sayid Akbar Sial Vardak departament vakillari hibsga olinishi siyosiy sabablarga ega ekanligini aytgan. AQSH vakillari turist sifatida mamlakatga kirib kelgan. “Tolibon” esa ularni josus sifatida ayblab hibsga olgan. Agarda tergovchilar departament vakillari josuslik faoliyati bilan shug‘ullangani va maʼlumot to‘plagani haqida hech qanday dalil topa olmasa, mahbuslar ozod qilinishi aytilgan.
“Bu shaxslar Afg‘onistonga avvalo nima uchun kelganlarini aniqlash kerak: josuslik uchunmi, turist sifatidami yoki madaniy obyektlarni ziyorat qilish uchunmi? Agar ularning maqsadi sayohat qilish bo‘lsa, qonun bo‘yicha qamalishi mumkin emas. Ammo agar ular g‘arazli niyatda kelgan bo‘lsa va josuslik faoliyati bilan shug‘ullangan bo‘lsa, qamoqqa olinib, qonun bo‘yicha jazolanishi shart”, degan siyosiy tahlilchi Sayid Akbar Sial Vardak.
“Tolibon” tomoni bergan rasmiy bayonotda departamentning faqat bir vakili josuslikda ayblanayotgani, qolgan ikki shaxs qonunbuzarlik sodir etgani uchun hibsga tashlangani taʼkidlanadi. “Tolibon” hukumati matbuot kotibi Hamidulloh Fitratning qo‘shimcha qilishicha, mahbuslar hibsga olinishi yuzasidan AQSH vakillari bilan muzokaralar olib borilgan. Ammo hozircha bir yechimga kelinmagan.
Afg‘oniston siyosiy arboblaridan Samiulloh Ahmadzay “Tolibon” va AQSH o‘rtasida munosabatlarni yaxshilash uchun Davlat departamenti vakillarini ozod qilishga chaqirgan. Bu bilan o‘rtadagi diplomatik to‘siqlarni olib tashlash va muammolarni hal qilish mumkinligi uqtirilgan.
“Agar bu mahbuslar topshirilsa va bunga ikki tomon ham rozi bo‘lsa, bu voqea diplomatik munosabatlarda taraqqiyotga olib keladi. AQSH va Islom Amirligi o‘rtasida noqulay munosabat muhiti yo‘qoladi”, degan Samiulloh Ahmadzay.
AQSH rasmiylari “Tolibon”ga murojaat qilib, hibsga olingan shaxslarning tergov hujjatlarini so‘ragan. Departament vakillari vakolatiga kirmaydigan, AQSH milliy manfaatlariga daxl qiladigan mavzularda ularni so‘roq qilmaslik talab qilingan.
Izoh (0)