Har yili Yer yuzida kamharakatlikdan 5 milliondan ortiq odam hayotdan ko‘z yumadi. Chunki kun davomida ofisda o‘tirib ishlash va jismoniy mashg‘ulotlar bilan shug‘ullanmaslik organizmda turli kasalliklarning rivojlanishiga zamin yaratadi. Ulardan biri bo‘yin osteoxondrozidir.
Osteoxondroz — bu umurtqalar, ularning tog‘aysimon disklari va boylamlarini degenerativ-distrofik o‘zgarishlari bo‘lib, ulardan bo‘yin osteoxondrozi keng tarqalgandir. Ushbu muammo 35 yoshdan oshgan odamlarning 40-85% ida kuzatiladi. Quyida bo‘yin osteoxondrozining asosiy belgilari va davolash usullarini ko‘rib chiqamiz.
Ma’lumki, bo‘yin umurtqa pog‘onasining eng harakatchan qismi. Undan bir qancha asab tomirlari va umurtqa arteriyasi o‘tadi. Uning vazifasi orqa miya qon tomirlari va uzunchoq miyani qon bilan taʼminlashdan iborat. Agar osteoxondroz sababli umurtqa arteriyasi bosilsa, bemorda bel va bosh miya ishemiyasi kuzatilishi ehtimoli bor. Shu sababli ushbu kasallikka eʼtiborsiz bo‘lish yaramaydi.
Bo‘yin osteoxondrozi bor insonda bosh sohasida kuchli va davomli og‘riq, bosh aylanishi, ko‘z xiralashishi, qo‘l barmoqlarida sanchiqlar, holsizlik, hansirash, arterial qon bosimining o‘ynashi kabi belgilar kuzatilishi mumkin. Bosh va bo‘yin qismida yuzaga kelgan og‘riqlar ularni qoldiruvchi vositalar qabulidan keyin o‘tib ketadi. Kasallik bir nechta bosqichda kechadi:
- Birinchi bosqich: agar bemor uzoq vaqt davomida bir holatda qolsa, bosh hech qanday sababsiz to‘satdan og‘riy boshlaydi. Qonda kislorod yetishmasligi tufayli tomirlarda spazmlar hosil bo‘ladi. Vaqt o‘tishi bilan dam olish va bosh massaji orqali og‘riq qoladi.
- Ikkinchi bosqich: bosh og‘rig‘i tez-tez bezovta qiladi, go‘yo boshni har tomondan qisib, bosgandek tuyuladi. Ushbu belgi bosh aylanishi, ko‘ngil aynishi, eshitish, ko‘rish va boshqa hislarning qisman yo‘qolishi bilan birga kelishi mumkin.
- Uchinchi bosqich: bosh og‘rig‘i surunkali tus oladi, miya yaxshi ishlamaydi. Og‘riq qoldiruvchi dori vositalarini qabul qilgandan keyin bir muddat o‘tib ketadi, ammo yana qaytalanadi. Bunday vaqtda ko‘plab bemorlar shifokorga murojaat qilishga majbur bo‘ladi.
Bo‘yin osteoxondrozini davolash: ishni nimadan boshlash kerak?
-FJmoGE76.webp)
Bugungi kunda zamonaviy tibbiyot ko‘plab turdagi farmatsevtik vositalar yordamida osteoxondrozning barcha turini davolash imkoniyatini beradi. Bo‘yin osteoxondrozi tufayli vujudga keladigan og‘riqlarni kamaytirish uchun uy sharoitida quyidagi mashqlarni bajarish mumkin:
- Oddiy qalam bilan bo‘yinning ikkita yon qismini uqalang. Bu mashq qon oqimini yaxshilaydi;
- Yelka qismida badantarbiya bajaring — qo‘llarning aylanma harakatlari bilan yelkani oldinga va orqaga siljiting va shu tariqa 10-20 soniya ushlab turing;
- Qo‘llarni peshonaga qo‘ying va ustidan bosing, boshni ham qo‘llarga qarata bosing. Xuddi shunday harakatni boshning orqa tomoni bilan ham bajaring;
- O‘ng qo‘lingizni chap chakkangiz ustidan o‘tkazing va boshingizni chapga torting, kaftlaringiz bilan boshni ushlab turing. Xuddi shunday harakatni o‘ng tomon bilan ham bajaring.
Unutmang, bunday mashqlar osteoxondrozni to‘liq davolamaydi va kasallik albatta shifokor nazorati va tavsiyalari asosida davolanishi zarur.
Izoh (0)