Ko‘katlar taomga nafaqat go‘zal bezak beradi, balki o‘zida uzoq umr va mustahkam salomatlikni ta’minlashga yordam beradigan foydali vitamin va minerallarni saqlaydi. Shifokor-diyetolog Elvina Dok avitaminoz va tanadagi shishlarga qarshi eng yaxshi uchta mavsumiy ko‘katlar haqida ma’lumot berdi.
Petrushka (maydanoz) — ayollar salomatligi va go‘zallik manbai
Istalgan ko‘katlar shishlarni bartaraf qilishda samara berishi mumkin, lekin ular orasida foydalilik jihatidan petrushka yetakchilik qiladi. U organizmdan ortiqcha suyuqlikni chiqarib, shishlarning bartaraf bo‘lishini tezlashtiradi. Ko‘kat tarkibida qimmatbaho minerallar: fosfor, kaliy, magniy, selen, temir va rux bo‘lib, ushbu foydali elementlar go‘zallikni saqlashga yordam beradi. Petrushka shirinliklarga bo‘lgan qaramlikni kamaytiradi. Uning tarkibida limonga qaraganda 4 baravar ko‘p C vitamini mavjud.
Aytgancha, petrushka qo‘shilgan salatlar metabolizmni yaxshilaydi va ayollarda hayz davrini tartibga soladi. Petrushkaning foydali xususiyatlari yaxshiroq ta’sir qilishi uchun uni qayta ishlanmagan yog‘lar, masalan, zaytun yog‘i bilan iste’mol qilish lozim. Bundan tashqari, petrushka ko‘zlarni ravshan qiladi va terini yoshartiradi, ammo homilador ayollarga uni tez-tez iste’mol qilish tavsiya etilmaydi.
Rayhon barglari shishlarni davolaydi
Ushbu xushbo‘y o‘simlik shifobaxsh xususiyatlarga to‘la bo‘lgani uchun xonaki dorivor o‘t deb ataladi. Uning tarkibidagi tanin kislotasi metabolizmni tezlashtiradi, immunitetni mustahkamlaydi.
Rayhon K, P vitamini va beta karotin miqdori bo‘yicha eng boy ko‘katlardan bo‘lib, undagi K vitamini go‘zallik va salomatlikni saqlash uchun juda muhim bo‘lgan kalsiy almashinuvida ishtirok etadi. P vitamini kuchli antioksidant vazifasini bajaradi hamda yurak-qon tomir salomatligini mo‘tadil saqlaydi.
Mazkur o‘simlik siydik haydash xususiyatga ega. Shuning uchun tanadagi shishlarni bartaraf etishda rayhondan foydalanish mumkin. Bunda kundalik suv balansini ta’minlashni unutmaslik lozim. Rayhonni quritilgan holatda, choyga solib yoki yangi uzilgan vaqtida ham iste’mol qilish mumkin.
Ismaloq — yurak salomatligi garovi
Har doim ismaloq deganda bolaligimizdagi kuchli dengizchi Papay haqidagi multfilmni yodga olasizmi? Albatta, siz bu o‘simlikdan bunday natijani kutmasligingiz aniq, biroq ismaloq tanaga keng ko‘lamli foydali ta’sir ko‘rsatadi. U immun tizimini mustahkamlaydi, qon tomirlarining holatini yaxshilaydi, qon bosimini barqarorlashtiradi va qondagi aterogen lipidlarning tarkibini kamaytiradi. Natijada yurak-qon tomir tizimining holati yaxshilanadi.
Kattalar uchun kuniga 50-100 gramm miqdorda ko‘katlar iste’mol qilish tavsiya etiladi.
Izoh (0)