Eron Isroilga hujum qilishga qaror qildi va bu haqda Vengriya TIV rahbari Peter Siyarto orqali xabar yubordi, deya The Jerusalem Post ma’lum qildi.
Xabarga ko‘ra, Siyarto Isroil TIV rahbari Isroil Katsga qo‘ng‘iroq qilgan va unga ushbu ma’lumotni Eron TIV rahbari vazifasini bajaruvchi Ali Bageri Kani bilan suhbat chog‘ida olganini tushuntirgan.
“Dunyo Erondan har qanday tajovuzkor harakatlari uchun tovon talab qilishi kerak”, deya ta’kidlagan Kats.
Isroillik vazir boshqa hech qanday ma’lumot bermagan.
Eron 31-iyulga o‘tar kechasi Tehronda HAMAS siyosiy byurosi rahbari Ismoil Haniyaning o‘ldirilishiga javoban Isroilga zarba berishni rejalashtirmoqda. Isroil tomoni hodisa yuzasidan rasman javobgarlikni o‘z zimmasiga olmagan.
Avvalroq WSJ nashri urushga olib kelsa ham, Eron Isroildan qasos olishga va’da bergani haqida xabar qilgandi. Qayd etilishicha, Eron rasmiylari arab diplomatlariga javob zarbasi urushga olib kelishi ular uchun ahamiyatsiz ekanini aytgan.
WSJ ma’lumotlariga ko‘ra, Qo‘shma Shtatlar Yevropa va boshqa hukumatlardan Eronga eskalatsiyaga qarshi xabar yuborishni va har qanday jiddiy hujum javob choralariga olib kelishi haqida ogohlantirishni so‘ragan. Bundan tashqari, Vashington Eron yangi prezidentining G‘arb bilan aloqalarini yaxshilashga qaratilgan sa’y-harakatlari, agar Eron vazminlik ko‘rsatsa, ko‘proq imkoniyatga ega bo‘lishiga ishora qilgan.
Izoh (0)