AQSH Markaziy qo‘mondonligi 6-avgust kuni Isroilga o‘zining ikkita yirik esminetsini jo‘natgan. Bu haqda Al Arabiya nashri xabar berdi.
Manbada aytilishida, esminetslar Isroil g‘arbiga kelib o‘rnashadi hamda mudofaa kuchlari tarkibiga qo‘shiladi. Rasmiylar joriy hafta davomida harbiy texnikalar yuborilishi yana davom etishini bildirgan.
Harbiy kemalarning yuborilishini ayrim AQSH rasmiylari Iroqdagi bazaga javob sifatida baholagan. Oldinroq AQSHning al-Asad aviabazasiga raketa hujumi sodir etilgan edi. Hujumda besh nafar amerikalik harbiy xizmatchi jarohatlangan.
AQSH prezidenti Jo Bayden 5-avgust kuni milliy xavfsizlik guruhi bilan Yaqin Sharqdagi so‘nggi voqealarni muhokama qilish uchun yig‘ilish o‘tkazgan. Unda ehtimoliy eskalatsiyaga qarshi turish, Isroilni himoya qilish hamda Yaqin Sharqdagi harbiy texnikalarni ko‘paytirish masalalari muhokama qilingan. Harbiy esminetslarni yuborish masalasi ham o‘sha yig‘ilishda kelishib olingan bo‘lishi mumkin.
Bir qancha manbalarga ko‘ra, AQSHning USS Cole va USS Laboon samolyotlari Ummon ko‘rfazidan Qizil dengizga ko‘chirilgan. Shu bilan birga Markaziy qo‘mondonlik (Centcom) qiruvchi samolyotlar hamda ballistik raketaga qarshi mudofaa qobiliyatiga ega qo‘shimcha kreyserlar va esminetslarni Yevropa va Yaqin Sharqqa joylashtirish to‘g‘risida buyruq chiqargan.
AQSH mudofaa vaziri Lloyd Ostin USS Abraham Linkoln va USS Teodor Ruzvelt aviatashuvchilari Yaqin Sharqda mustahkam o‘rnashgani va jangovar holatda ekanini bildirgan. Bu kemalar Isroilni muhofaza qilish halqasining bir qismi bo‘lib qolishi aytilgan.
Pentagon, shuningdek, Yaqin Sharqqa BMD tizimlarini joylashtirish va qiruvchi samolyotlar eskadronini jo‘natish uchun tayyorgarlik ko‘rmoqda. Ushbu texnikalar joriy hafta davomida yetkaziladi.
Izoh (0)