Bangladesh bosh vaziri Shayx Hasina 5-avgust kuni mamlakatni tark etgan. Bu haqda Janubiy Osiyo nashrlariga tayanib, CNN xabar berdi.
Manbada aytilishicha, Shayx Hasina rasman lavozimidan isteʼfoga chiqqanini eʼlon qilgan. Bu bayonot hukumat xatti-harakatlariga qaramay Bangladeshdagi namoyishlar davom etishi hamda hukmron elitaga qarshi nafrat kuchayishi ortidan yuzaga kelgan.
Bangladesh armiyasi qo‘mondoni general Vakir uz-Zamon hukumatning poytaxtdan chiqib ketganini tasdiqlagan. Bosh vazirning o‘z vazifasini topshirish qarori Dakkadagi prezident idorasiga hujumdan so‘ng imzolangani aytilgan.
Ijtimoiy tarmoqlarda tarqalgan videolarda bosh vazir rezidensiyasi yaqinida yong‘in yuzaga kelganini ko‘rish mumkin. Qarorgohni qo‘riqlayotgan harbiy qism ko‘p sonli namoyishchilarga qarshilik ko‘rsata olmay, ularni o‘tkazib yuborgan.
Bosh vazir qarorgohiga hujum ortidan Shayx Hasina vertolyotda mamlakatni tark etgan. Hindiston manbalari u Dehlidagi Hindon bazasida kutib olinganini xabar bergan. Isteʼfoga chiqqan bosh vazir Hindistonda nima qilayotgani hozircha nomaʼlum.
Bangladesh davlat nashrlari Shayx Hasina Londonga qochayotganini yozgan. Mamlakatdagi hozirgi vaziyat sobiq bosh vazir uchun xavf tug‘dirishi, shu bois u Bangladeshga qayta olmasligi xabar qilingan.
Inson huquqlarini himoya qilish tashkilotlari hozirga qadar Bangladeshda g‘alayonlar oqibatida 100 dan ortiq fuqaro halok bo‘lganini yozgan. 5-avgust kuni to‘qnashuvlar tarixida yangi ssenariy kuzatilib, politsiya poytaxt Dakkada olomonga qarata o‘q uzgan. Oqibatda 67 kishi halok bo‘lgan, politsiyachilardan 13 kishi jarohatlangan.
Tahlilchilar bosh vazirning ketishi yaqin orada tinchlikni kafolatlashga asos bo‘lishi mumkinligini bildirgan. Aholining adolatsiz mehnat kvotasini taqiqlash to‘g‘risidagi talabi esa bosqichma-bosqich amalga oshirilishi aytilgan.
Izoh (0)