Buyuk Britaniya Tashqi ishlar vazirligi Yaqin Sharq mintaqasida keskinlik kuchayganligi sababli Livandagi Britaniya fuqarolari mamlakatni tezda tark etishlari kerakligini aytdi.
“Hukumat Livanga sayohat qilmaslikni maslahat berishda davom etmoqda va hali ham Livan hududidagi britaniyaliklarga yo‘lovchi reyslari mavjud bo‘lgan paytda mamlakatni zudlik bilan tark etishni maslahat beradi”, deyiladi Britaniya Tashqi ishlar vazirligi bayonotida.
“Tanglik yuqori darajaga yetdi va vaziyat tezda yomonlashishi mumkin. Biz Livandagi mavjudligimizni konsullik darajasida kuchaytirish uchun kecha-yu kunduz ishlayapmiz. Aytish joizki, mening Livandagi inglizlarga murojaatim: zudlik bilan mamlakatni tark eting”, deydi Britaniya tashqi ishlar vaziri.
“Mojaroning kengayishi hech kim uchun foydali emas. Bunday mojaroning oqibatlari halokatli bo‘lishi mumkin, shuning uchun biz vaziyatni tinchlantirish va diplomatik yo‘l bilan hal qilishga chaqirishda davom etamiz”, deya qo‘shimcha qildi vazir.
Iyul oyi oxirida Tehronda Falastinning HAMAS harakati Siyosiy byurosi rahbari Ismoil Haniya o‘ldirilgan edi. Tehron qotillikda Isroilni aybladi. Isroil tomoni bu ayblovlarga izoh bermadi. Bundan tashqari, iyul oyida Bayrutda Livanning Eronga yaqin bo‘lgan “Hizbulloh” guruhining harbiy yetakchilaridan biri Fuad Shukr Isroilning zarbasi natijasida o‘ldirilgan edi.
Eron rasmiylari bu hujumlarni javobsiz qoldirmaslikka va’da berdi. Shundan so‘ng qator davlatlar Eron Livan, Iroq va Yamandagi ittifoqchi guruhlar bilan birgalikda Isroilga qarshi javob zarbalarini tayyorlamoqda, degan xavotir bildirdi.
Izoh (0)