Joriy yil 1-avgust kuni Toshkent shahrida Savdo-sanoat palatasi, Soliq qo‘mitasi va boshqa idoralar rahbarlari eksportchi korxona vakillari bilan uchrashuv o‘tkazdi. Muloqotda tadbirkorlarni qiynayotgan muammolar va ularga yechim topish masalasi muhokama qilindi.
Suhbat jarayonida Farg‘ona viloyatidagi “Sulton agro imeks” MCHJ vakili kungaboqar urug‘lari eksporti bo‘yicha taqiqni olib tashlashni so‘radi.
Tadbirkorning aytishicha, prezident farmoni bilan kungaboqar urug‘lari eksporti 2025-yil 1-yanvargacha taqiqlangan.
Cheklovni olib tashlash yoki qandolat maqsadida ishlab chiqaruvchini bu ro‘yxatdan chiqarish kerak. Bojxonaga borsangiz, “kungaboqarni qovurib, keyin eksport qil”, deydi. Mahsulotni qovursangiz, bir hafta ochiqda saqlansa, buziladi. Muammo shuki, kungaboqarni qandolat yo‘nalishida eksport qilmoqchi bo‘lsak ham, urug‘chilik va yog‘ olish maqsadida sotilayotgandek ko‘rsatilib, eksportga taqiq bo‘lmoqda. Biz eksport qilmoqchi bo‘lgan oq gibrid kungaboqardan, yaʼni qimmat tovardan yog‘ olinmaydi. Lekin uning eksporti taqiqlangan. Buni eksport qila olmasak, ichki bozorda qanday tugata olamiz? Har doim qora, yog‘ miqdori ko‘p bo‘lgan kungaboqardan yog‘ olinadi, dedi tadbirkor.
Savdo-sanoat palatasi raisi Davron Vahobov bu muammo rostligini aytdi.
Siz to‘g‘ri muammoni aytdingiz. Lekin buning yechimi bizning vakolatimizga kirmaydi. Taklifingizni hukumatga yetkazamiz va qisqa muddatda yechim beramiz, dedi u.
Mavzu bo‘yicha muloqotga denovlik tadbirkor ham qo‘shilib, farg‘onalik hamkasbi fikriga eʼtiroz bildirdi. Uning aytishicha, xomashyo holatidagi oq kungaboqarni eksport qilgandan ko‘ra, tayyor mahsulot holatiga keltirib sotgan afzal.
Uchta zavod bilan hamkorlik qilaman. Ularda 250 nafar ishchi ishlaydi. Zavodlar “semechka”ni qovurib, qayta ishlab, qadoqlab, menga yetkazib beradi. Men esa tayyor mahsulotni eksport qilaman. Xomashyo holatidagi kungaboqar mahsuloti eksport qilinishiga qarshiman. Xom “semechka” eksportiga ruxsat berilsa, ichki bozorda mahsulot tannarxi oshib ketadi. Oqibatda ko‘p ishchilar ishsiz qolishi mumkin. Bizga tayyor mahsulotni eksport qilish ko‘proq foyda keltiradi, dedi tadbirkor.
Yana bir tadbirkor mazkur fikrga qarshi chiqib, O‘zbekistonda kungaboqar mahsulotlari ko‘p yetishtirilayotgani, xomashyo holatida ham eksport qilish maqsadga muvofiq ekanini aytdi.
Siz imkoningiz yetsa, ikki ming tonnagacha kungaboqarni tayyor holatga keltira olishingiz mumkin. O‘zbekistonda yiliga 50–60 ming tonna “semechka” yetishtiriladi, dedi u.
Mavzu yopilishida Davron Vahobov sohadagi tadbirkorlar yig‘ilib, kungaboqar yetishtirish va qayta ishlashdagi quvvat aniq hisoblab chiqilishi kerakligini aytdi. Agar korxonalarda dalalardagi kungaboqarlarni to‘liq qayta ishlashga imkoniyat yetarli bo‘lmasa, ortiqcha mahsulotni eksport qilish samaraliroq ekani ta’kidladi.
Izoh (0)