Farg‘onada 4 nafar piyodaning o‘limiga sababchi bo‘lgan haydovchi 9 yil muddatga ozodlikdan mahrum qilindi. Bu haqda viloyat YHXB matbuot xizmati xabar berdi.
2024-yil 20-fevral kuni fuqaro SH.V. Cobalt avtomashinasini Qo‘qon—Mulkobod—Gulbog‘ Pungan avtomobil yo‘lining Dang‘ara tumanidan o‘tgan qismida boshqarib ketayotib, boshqaruvni yo‘qotib, yo‘lning o‘ng chetida harakatlanib ketayotgan 5 nafar piyodani urib yuborib, hodisa joyidan yashiringan.
Olib borilgan surishtiruv ishlari natijasida 26 yoshli haydovchining shaxsi aniqlangan va mast holda avtomobil boshqargani ma’lum bo‘lgan. O‘tkazilgan sudga oid kimyoviy ekspertiza xulosasiga ko‘ra, haydovchi spirtli ichimlik ichgani va kuchli ta’sir qiluvchi “tropikamid” dori vositasini qabul qilgani aniqlangan.
Mazkur holat yuzasidan viloyat IIB huzuridagi Tergov boshqarmasi tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, haydovchi qamoqqa olingan.
Jinoyat ishi Qo‘qon shahar jinoyat ishlari bo‘yicha sudi tomonidan ko‘rib chiqilgan. Haydovchi SH.V. sudda aybiga to‘liq iqrorlik bildirgan.
Sud hukmi bilan u Jinoyat kodeksining 117-moddasi 3-qismi “a” bandi (xavf ostida qoldirish odamlar o‘limiga sabab bo‘lishi) va 266-moddasi 3-qismi “a” bandida (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) nazarda tutilgan jinoyatlarni sodir etganlikda aybli deb topilgan.
Unga 3 yil barcha turdagi transport vositalarini boshqarish huquqidan mahrum qilgan holda 9 yil muddatga ozodlikdan mahrum qilish jazosi tayinlangan. Jazoni manzil-koloniyalarda o‘tash belgilangan.
Oliy sud matbuot xizmati bergan ma’lumotga ko‘ra, 2024-yilning birinchi yarmida transport vositalarini mast holda boshqarish hamda transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi bilan bog‘liq maʼmuriy huquqbuzarliklar bo‘yicha 14 556 nafar shaxsga nisbatan 14 427 ta ish ko‘rib tamomlangan. Shundan 12 867 nafar shaxsga nisbatan jarima, transport vositasini boshqarish huquqidan mahrum etish va maʼmuriy qamoqqa olish kabi maʼmuriy jazolar qo‘llangan.
Izoh (0)