Jaziramada ayni muddao: sovitish xususiyatiga ega ko‘rpa ixtiro qilindi (foto)

HILU kompaniyasi tomonidan taqdim etilgan startap odatiy ko‘rpa tushunchasini butunlay o‘zgartirib yubordi. Endi nafaqat sovuq kunlarda isitadigan, balki yozda salqinlik beradigan adyollar ham mavjud.

HILU Bluvet gibrid ko‘rpasi uyqu qulayligiga inqilobiy yondashuvni taklif etadi. U shaxsiy konditsioner kabi sovitish funksiyasiga ega bo‘lib, innovatsion texnologiya asosida ishlab chiqilgan.

HILU Bluvet sog‘lom va qulay uyquni ta’minlash uchun mo‘tadil haroratni saqlash imkoniyatiga ega. Ushbu tekstil matosi Eco-cool Polyfibers nomli maxsus tolalardan ishlab chiqariladi. HILU kompaniyasining Adaptex CoolWeev matosi uzoq muddat xizmat qilishga bardoshli va vazni yengildir.

Kompaniya ta’kidlashicha, boshqa sovitish xususiyatli materiallaridan farqli o‘laroq, HILU Bluvet ortiqcha issiqlikni tanadan emas, balki havodan oladi.

Bundan tashqari, Adaptex CoolWeev matosi mikroblarga qarshi va gipoallergendir. Bu esa adyolda bakteriyalar va hid to‘planishining oldini oladi. Uni kir yuvish mashinasida tozalash mumkin.

Ko‘plab insonlarga bu g‘oya shu qadar manzur bo‘ldiki, startapni qo‘llab-quvvatlash uchun 50 000 dollar to‘plandi.

HILU Bluvet oq, ko‘k va och yashil ranglarda, ikki xil o‘lchamda mavjud. Kickstarter platformasida uning narxi 159 dollarga baholangan.