Karyera birinchi o‘rinda: farzand ko‘rishni istamaydigan turk aktrisalari

Zamonaviy Turkiyada yosh ayollar tobora kasbiy mahoratga erishish, sifatli ta’lim olish va moliyaviy mustaqil bo‘lishga intilmoqda. Quyidagi turk aktrisalari ham shaxsiy maqsadlar va kasbiy faoliyatini farzandli bo‘lishdan ustun qo‘yadi va buni jamiyatdan yashirmaydi.

Nebahat Chehre

“Muhtasham yuz yil” serialida Ayshe Hafsa — sulton volidasi rolini ijro etgan 80 yoshli turk aktrisasi ulug‘ yoshga yetsa ham doimo go‘zal ko‘rinishda. Uning shou-biznes olamiga sayohati go‘zallik tanlovidan boshlandi. Nebahat Chehre ikki marta turmushga chiqqan, ammo ikkala turmushida ham baxtli bo‘la olmagan. Uning turmush o‘rog‘i aktrisaning mashhurligini yoqtirmas, ishlashga taqiq qo‘yar va hatto kaltaklardi. Intervyulardan birida Nebahat yoshligida homiladorligini bir necha bor sun’iy ravishda to‘xtatganini tan olgan.

Aktrisa o‘z ishini shunchalar yaxshi ko‘rar ediki, bolalar bunga to‘sqinlik qilishidan qo‘rqardi. Nebahat karyerasini xavf ostiga qo‘yishni istamadi va o‘zini butunlay kinoga bag‘ishlashga qaror qildi. Aktrisa so‘zlariga ko‘ra, ish faoliyatining o‘zi Chehre uchun bir farzanddir va u nasl qoldirishdan bosh tortganiga hech qachon afsuslanmaydi.

Gulchin Santirjio‘g‘lu

“Qo‘rg‘on sirlari” turk melodramasi yulduzi, 47 yoshli aktrisa Gulchin Santirjio‘g‘lu serialda Ferit otasining sevgilisi, beva ayol Ifakat rolini o‘ynagan. Izmirlik aktrisa musiqa sohasida tahsil olgan, u Dokuz Eylul universiteti konservatoriyasining opera qo‘shiqchiligi fakultetini tamomlagan va bir necha yil vokal o‘qituvchisi bo‘lib ishlagan. Aktrisa ko‘plab muvaffaqiyatli loyihalarda ishtirok etgan va bir necha yildan beri baxtli hayot kechirib kelmoqda. Uning turmush o‘rtog‘i mashhur turk yozuvchisi Utku Bashyaziji bo‘lib, ular farzand ko‘rishni xohlamasligini hech qachon yashirmagan. Aktrisa har doim o‘z fikrini to‘g‘ridan to‘g‘ri aytadi: “Biz ikki kishidan iborat oilamiz va juda baxtlimiz”.

Santirjio‘g‘lu asosiy vaqtini suratga tushish ishlari, sayohat qilish, ispan tilini o‘rganish va shaxsiy rivojlanishga sarflaydi. Gulchin intervyularda farzand ko‘rmaslik qarori turmush o‘rtog‘i bilan birgalikda kelishilganini va tanqidiy fikrlarga hech qachon e’tibor bermasligini ta’kidlaydi.

Evrim Alasya

“Klyukva sharbati” seriali yulduzi Evrim Alasya 2-avgust kuni 45 yoshni qarshi oladi. Aktrisa hech qachon rasman turmushga chiqmagan. Ammo uning shaxsiy hayoti haqida ko‘plab mish-mishlar paydo bo‘lib turadi. Bir vaqtlar u Xaluk Bilginer bilan munosabatda bo‘lgan, shu sababli uning rafiqasi aktyor bilan ajrashishga qaror qilgan. Alasya bu voqealarni doim rad etib kelgan va Xaluk uning do‘sti, ustozi, otasi kabi yaqin insoni ekanini aytgan.

Evrim Alasya hayotida hozirda sevimli insoni borligini va ular turmush qurishi mumkinligini yashirmaydi. Biroq uning ismi ommaga oshkor qilinmagan. U farzandli bo‘lish mavzusida so‘zlashishni yoqtirmaydi. Aktrisa bir necha marta karyera birinchi o‘rinda turishini ta’kidlab o‘tgan.

Deniz Baysal

33 yoshli aktrisa allaqachon kinoda olamida muvaffaqiyat qozonib bo‘lgan. U  “Fazilat xonim va qizlari”, “Qochqin kelinlar”, “Va’da”, “Otalar va o‘g‘illar” kabi mashhur seriallarda rol o‘ynagan. 2019-yilda taniqli musiqachi Barish Yurtjuga turmushga chiqdi. Jurnalistlarning doimiy savollaridan charchagan Deniz turmush o‘rtog‘i ikkisi farzand ko‘rishni xohlamasligini rasman e’lon qildi.

Yuqorida tilga olingan aktrisalar farzand ko‘rishni istamasligini shaxsan e’lon qilgan. Ba’zi turk nashrlari Beren Saat, Birje Akalay va Gyozde Kansu kabi aktrisalarni ham chayldfri ayollar safiga kiritadi.