Afg‘onistonning Qo‘shtepa kanali qurilishi bo‘yicha loyihaning ikkinchi qismi 58 foizga yakunlandi. Bu haqda Qo‘shtepa kanalini rivojlantirish milliy kompaniyasi vakili Said Zabihulla Miriy ma’lum qildi.
Hozirda qurilishga 3,5 ming kishi va 3 ming texnika jalb etilgan. Qo‘shtepa kanali 5 yildan keyin o‘z faoliyatini boshlaydi, deya qo‘shimcha qildi Said Zabihulloh Miriy.
“Tolibon” rejasiga ko‘ra, kanal Balx, Juzjon va Faryob viloyatlaridagi 500 ming gektarga yaqin yerni suv bilan ta’minlashi kerak. Qo‘shtepa kanalining ishga tushirilishi Afg‘onistonga yillik o‘rtacha 500 million dollar daromad keltiradi, degan edi afg‘on suv resurslarini boshqarish bo‘yicha ekspert Najibulla Sadid.
Mutaxassislarga ko‘ra, Afg‘onistonda qurilayotgan Qo‘shtepa kanali umumiy drenajdan yiliga 10 kub kilometr suv oladi, xususan, bu Amudaryoga ham tegishli.
“Tolibon”ning yirik loyihasi va xavflar
Qo‘shtepa kanali loyihasi Amudaryoning suv resurslarini boshqarish sohasidagi yirik loyihalardan biridir, u hozirda Afg‘oniston shimolida amalga oshirilmoqda. Kanalning birinchi bosqichi ishga tushirilgan, ammo Markaziy Osiyo davlatlari bu loyihadan xavotirda.
The Economist prognoziga ko‘ra, agar kanal qurib bitkazilsa, mintaqaviy mojaroning kuchayishiga olib kelishi mumkin. Kanal Amudaryo suvini O‘zbekiston bilan chegaraga yo‘naltiradi. Afg‘oniston elektr energiyasining katta qismini O‘zbekistondan import qilishi hisobga olinsa, “Tolibon” qo‘shni respublikaga qarshi chiqolmasligi mumkin.
“Iqlim o‘zgarishi O‘zbekistonni 15 foiz suv yo‘qotishiga sabab bo‘lmoqda, agar kanal qurilishi ortidan yana 10 foiz yo‘qotsa, O‘zbekiston 25 foiz suv yo‘qotishi mumkin”, deyiladi yana bir prognozda.
O‘zbekiston prezidenti Shavkat Mirziyoyev “Tolibon” tomonidan Qo‘shtepa kanali qurilishi Markaziy Osiyodagi suv rejimi va muvozanatini o‘zgartirishini aytgandi. “Tolibon” esa O‘zbekiston Qo‘shtepa kanalidan zarar ko‘rmasligiga va’da bergan.
Izoh (0)