Isroil armiyasi Livan poytaxti Bayrutga hujum uyushtirib, Golan tepaliklaridagi Majdal Shams qishlog‘ida bolalar va tinch aholi o‘limida aybdor deb topilgan “Hizbulloh” qo‘mondonlaridan birini nishonga olganini e’lon qildi.
Aviazarba Livan poytaxtining janubiy chekkasiga qaratilgan. Reuters manbasiga ko‘ra, gap Hizbullohning yuqori martabali qo‘mondoni haqida ketmoqda, uning taqdiri noma’lum. Times of Isreal nashrining yozishicha, armiya zarbasi guruh rahbari Hasan Nasrullohning katta maslahatchisi Haj Mohsin nomi bilan tanilgan Fuad Shukrga qaratilgan. Isroil mudofaa kuchlari uni “Hizbulloh” uchun aniq raketalar yaratish loyihasining rahbari deb atagan.
27-iyul kuni Golan tepaliklarida joylashgan Majdal Shams qishlog‘iga uyushtirilgan raketa hujumi oqibatida 11 nafar isroillik bola halok bo‘lgan, o‘nlab odamlar jarohatlangan edi. Isroil hujum ortida “Hizbulloh” guruhini ayblagan. Guruh hujumga aloqadorligini tan olmagan, biroq Majdal Shamsga qilingan hujumdan bir soat oldin “Hizbulloh” Isroilning Livan janubidagi aholi punktlarini o‘qqa tutganiga javoban raketa hujumi uyushtirganini ma’lum qilgan.
Livan rasmiylari Majdal Shamsning o‘qqa tutilishini qoralagan.
Livan hukumati har qanday tinch aholiga qarshi zo‘ravonlik va hujumlarni qoralaydi hamda barcha jabhalarda harbiy harakatlarni zudlik bilan to‘xtatishga chaqiradi, deyiladi Bayrut bayonotida.
Izoh (0)