Qon aylanishi yurak qisqarishi tufayli qonning organizmda maxsus sistema orqali harakatlanishidir. U organizm to‘qimalari bilan tashqi muhit orasidagi moddalar almashinuvi turg‘unligini taʼminlaydi va hujayralarga kislorod, suv, oqsil, uglevodlar, yog‘, mineral moddalar, vitaminlarni olib keladi.
Beylor tibbiyot oliygohi (AQSH)dagi tibbiyot dotsenti Veyenadxari Van Medical Xpress nashriga bergan intervyusida qon aylanish tizimi ishdan chiqishining turli belgilari haqida ma’lumot berdi.
Shifokorning so‘zlariga ko‘ra, qon aylanishining yomonlashganida eng ko‘p uchraydigan belgilarga sababsiz titroq, butun tananing sanchib og‘rishi hamda qo‘l va oyoq uchlarining uvishishi kiradi. Ba’zan og‘riq kuchayib ketishi va asosan oyoq barmoqlari va tovon qismida namoyon bo‘lishi mumkin.
Qon aylanish tizimi buzilganda uzoq vaqt piyoda yurgandan so‘ng son va boldir qismlarida ham og‘riqlar paydo bo‘ladi. Ushbu patologiyaning boshqa belgilariga yara va jarohatlarning sekin bitishi hamda doimiy rangparlik kabilar kiradi. Organizm hayotiy muhim bo‘lgan organlarga qon oqimini yetkazib berishga harakat qiladi, shuning uchun qon aylanishi bilan bog‘liq muammolarning belgilari birinchi navbatda qo‘l va oyoq uchlarida seziladi.
Shifokor Veyenadxari Van ta’kidlashicha, qon aylanishining yomonlashishiga ko‘plab ekologik va genetik omillar hamda noto‘g‘ri turmush tarzini olib borish ham olib keladi. Qandli diabet bilan og‘rigan bemorlar, chekuvchilar va erkaklarda qon aylanish tizimining buzilish xavfi yuqoridir.
O‘z vaqtida davolanmagan kasallik yurak va jigar kabi muhim ichki organlar faoliyatining buzilishiga olib keladi va turli patologiyalarni keltirib chiqaradi.
Izoh (0)