Kino tarixidagi eng qimmat serial nomi e’lon qilindi

Bloomberg nashri “Ajratish” ilmiy-fantastik trillerining ikkinchi mavsumini kino tarixidagi eng qimmat ko‘p qismli loyiha deb atadi. Jurnalistlar Apple TV+ striming xizmati holati va loyihaga sarflangan mablag‘ni o‘rganib chiqib, shunday xulosaga kelishdi.

Serial rejissyori Ben Stiller loyihaning birinchi mavsumiga ajratgan byudjet 40 million dollardan oshgandi, serial davomi esa har bir epizod uchun 20 million dollarga tushdi. Qayd etilishicha, “Ajdaholar uyi” seriali ham xuddi shunday umumiy byudjetga ega, biroq mazkur serial katta muvaffaqiyatga erishdi va “Ajratish” dan ko‘ra ko‘proq mashhur bo‘ldi.

Ma’lum bo‘lishicha, Apple TV+ striming xizmati hanuz auditoriyani jalb qilishda katta muammolarga duch kelmoqda. “Ajratish” ning ikkinchi mavsumi uchun ham katta xarajatlar bo‘lish kutilmoqda. Kompaniya keyingi yil yanvar oyida yangi epizodlarni chiqarish orqali imkon qadar ko‘proq tomoshabinlarni jalb qilishga umid bildirgan.

“Ajratish” (“Severance”) — Amerikaning psixologik triller janridagi ilmiy-fantastik teleseriali. Unda Lumon Industries kompaniyasining Mark ismli xodimi ishi bilan bog‘liq bo‘lmagan xotiralar va ishdagi xotiralarni “ajratish” protsedurasiga rozi bo‘ladi. Serial birinchi mavsumi 2022-yilda namoyish etilgan. Loyihada aktyorlardan Adam Skott, Zak Cherri, Britni Louer hamda Jen Tallok ishtirok etgan.