Fransiya rasmiylari Olimpiya o‘yinlari oldidan Parijdan haydab chiqarishga uringan 300 dan ortiq uysizlar 18-okrug meriyasi yaqinida o‘zlariga uy-joy berish talabi bilan norozilik namoyishi uyushtirdilar.
Bu haqda X ijtimoiy tarmog‘ida “Utopia 56” gumanitar assotsiatsiyasi ma’lum qilgan.
“Fransiya Olimpiadaga tashrif buyuruvchilarni kutib olishga tayyorlanar ekan, bu oilalar ko‘chalarda amallab kun kechirishmoqda”, deyiladi uyushma bayonotida. Ma’lumotlarga ko‘ra, namoyish ishtirokchilari orasida erkaklar, ayollar va bolalar ham bor.
Qayd etilishicha, birinchi norozilik ishtirokchilari seshanba kuni meriya binosiga kelgan. Ma’lumotlarga ko‘ra, namoyishchilarning aksariyati tunni ko‘chada, piyodalar yo‘lagidagi ko‘rpachalar ustida o‘tkazgan.
So‘nggi kunlarda Fransiya hukumati Parij 2024-yilgi yozgi Olimpiya o‘yinlariga tayyorgarlik ko‘rish maqsadida ko‘chalarda yashovchi uysizlarni ommaviy ravishda Parij tashqarisiga haydab chiqarmoqda.
2024-yilgi yozgi Olimpiya o‘yinlari Fransiya poytaxti Parijda 26-iyuldan 11-avgustgacha bo‘lib o‘tadi.
Izoh (0)