Moskvada strategik raketa kuchlarini boshqarish markazining yuqori martabali ofitseri Andrey Torgashevning mashinasi portlatib yuborildi. Bu haqda “Agentstvo” xabar berdi.
Portlash Moskva shimolida, Sinyavinskiy ko‘chasida yuz bergan. Dastlab, Toyota Land Cruiser avtomobilida Torgashev va yana bir kishi bo‘lgani xabar qilingan. Keyinroq Torgashevning rafiqasi portlash vaqtida eri jarohatlanmagani, mashinada boshqa odam bo‘lganini aytgan.
Rossiya ichki ishlar vazirligi rasmiy vakili Irina Volk hodisaga “belgilanmagan predmet”ning portlashi sabab bo‘lganini bildirgan. “Kommersant” ma’lumotlariga ko‘ra, bu trotil ekvivalentida yarim kilo quvvatga ega bo‘lgan portlovchi qurilma edi. Tergov qo‘mitasi jinoyat ishi qo‘zg‘atilganini ma’lum qilgan, ammo qaysi moddaga asoslanganiga aniqlik kiritmagan.
“TASS”ning yozishicha, ish qotillikka urinish moddasi bo‘yicha qo‘zg‘atilgan. “RIA Novosti” huquq-tartibot idoralariga tayanib, portlashning versiyalaridan biri kasbiy faoliyat ekanini yozmoqda. Rossiya ommaviy axborot vositalari mashinaga portlovchi qurilma o‘rnatilgani aks etgan videolarni tarqatmoqda.
Ukraina prezidenti ofisi rahbari maslahatchisi Mixail Podolyak Kiyevning mazkur portlashga aloqasi yo‘qligini aytgan:
“Tushunishimcha, u yerda (mashinada) nosoz uskunalar bo‘lgan. Albatta, bizning bunga hech qanday aloqamiz yo‘q”, degan u.
“Moskovskiy Komsomolets” nashrining yozishicha, Torgashov bir necha yil avval maxfiy harbiy qismlardan birida xizmat qilgan, bir muddat Novosibirsk va Kaliningradda yashagan. Shundan keyin Moskvaga ko‘chib kelgan.
Izoh (0)