Instagram tarmog‘ida 450 mingdan ortiq obunachiga ega bo‘lgan Husan Mirzahabibov o‘zining noodatiy sanʼat turi bilan ko‘pchilikning eʼtiboriga tushgan. Endigina 19 yoshni qarshilagan qahramonimiz kubik-rubik va iplar yordamida insonlar suratini chizadi. Tarmoqqa joylagan videolarini esa minglab obunachilar tomosha qiladi. Boisi bunday ijod namunasi o‘zbek auditoriyasi uchun yangilikdir.
“Avtohalokat qiziqishlarimni o‘zgartirgan”
— Zomindagi oddiy oilada dunyoga kelganman. Dadam tadbirkorlik bilan shug‘ullanadi. Onam uy bekasi. Beshta o‘g‘ilmiz. Biz Hasan va Husan — kichik farzandlarimiz. Bolaligim hamma bolalar kabi oddiy o‘tgan. Ammo sodir bo‘lgan bir voqea sabab hayotim o‘zgarib ketdi.
Maktabni tamomlab universitetga o‘qishga kiraman, deb yurgan vaqtlarim avtohalokatga uchradim. Voqea qanday bo‘lganini eslay olmayman. Ko‘zimni ochganimda shifoxonada yotardim. Oyoq suyaklarim sinib ketgandi, hatto kesib tashlashlari ham mumkin edi. Yurib turgan inson birdan to‘rt devor ichida yotib qolsa qiyin ekan. Salkam bir yarim yil davomida uyda davolanishimga to‘g‘ri keldi. Zerikib internetdagi suratlarni ko‘rib o‘tirsam kubiklardan yasalgan surat e’tiborimni tortdi. So‘ngra kubik-rubiklardan rasm chizishni o‘rganish istagi paydo bo‘ldi. Yaxshi rasm chizganim uchun o‘rganishim ham oson bo‘ldi. Bu sohaning yo‘nalishlari esa juda ko‘p. Kubik-rubik ham ularning bir turidir. Iplardan surat ishlash esa yana bir turidir. Asta-sekin o‘rgana boshladim, yana kubik sotib olishim kerak edi. Ota-onam bu safar ham qo‘llab-quvvatladi. Xitoydan kubiklar sotib olib berishdi. Hozirda uyimda 11 mingdan ortiq kubiklar bor.
“Bitta surat uchun 7 soat vaqt sarflayman”
— Birinchi kubik-rubikdan Dilimi taxallusi orqali tanilgan blogerni suratini chizganman. Uni tayyorlash uchun 4 kun vaqtim ketgandi. Birinchi marta taxlayotganimda kubiklarim qulab tushgan. Yana qaytadan terib chiqqanman. Video olib, montaj qilishni unchalik yaxshi bilmasdim. Ammo keyinchalik o‘rgandim. Hozir vaqt mashinasi orqaga qaytganda, boshqa insonlarni ham rasmini chizardim. Negaki birinchi suratini ishlashga eng munosib odamlar ko‘p ekanligini angladim. So‘ngra ko‘plab xalqimiz sevgan insonlarni rasmlarini tayyorlashni boshladim. Ular orasida chet el prezidentlari hamda mashhurlarning qiyofalari ham bor. Bir rasmni chizishim uchun odatda yetti soat vaqt ketadi. Ammo ishni boshlashdan avval 3-4 kun o‘sha insonni o‘rganaman. Ijodini kuzatib, suratlarini yig‘ib yuraman. Qanday chizish-u qanday holatda bo‘lishini rejalashtiraman.
Bu orada odamlardan ham takliflar tushdi.To‘ylarga ham taklif qilib, ota-onasini suratlarini tayyorlashimni so‘raydiganlar bo‘ldi. Bo‘sh vaqtimda ularga ham borib turaman. O‘shanda ularning qanchalik xursand bo‘lganini ko‘rib qiyinchiliklarim, chizish uchun ketgan vaqtim zoye ketmaganidan xursand bo‘laman.
“Hamdam Sobirov mehnatimni qadrlamadi”
— Ba’zida bu ishlardan voz kechgim keladi. Chunki odamlar ishimni qadrlamagandek, tushunmayotgandek ham tuyuladi. Bolalar kunida o‘zimizning tumanda panda rasmini chizdim. Bolalar beg‘uborlik bilan tomosha qilardi. Ammo ota-onalari boshqacha munosabatda bo‘ldi. Ularni urishib “yur, vaqtimni olma, bekorchi narsalarga” deya olib ketganlariga guvoh bo‘ldim. Shuni eshitganimdan keyin boshlagan ishimni ham chizgim kelmay, arang tugatdim. Sheriklarimga bitta suratga olib, yig‘ishtirib tashlanglar, dedim. Bizda ko‘pchilik bu kabi sohalarni, ijod namunalarini unchalik tushunmaydi. Ayrim mashhurlar chizgan rasmlarimga javob bermagan holatlari ham bo‘lgan. Qadriga yetishi haqida gapirmasam ham bo‘ladi. Boshqa davlatlarda esa bu sohadan musobaqalar ham o‘tkaziladi. Hamdam Sobirovning ijodini yaxshi ko‘rganim sabab uning tug‘ilgan kuniga portretini tayyorlagandim. Ammo u hech narsa demadi, ya’ni bir necha soatlik mehnatimga e’tibor ham bermadi.
“3 ming dollargacha daromad topaman”
— Ijodim davomida ko‘plab davlat rahbarlarining ham suratlarini kubik-rubiklar yordamida ishlaganman. Ammo eng sevimli suratlarim — bu Shavkat Mirziyoyev, Shayx Muhammad Sodiq Muhammad Yusuf hazratlari va birinchi prezidentimiz Islom Karimovniki bo‘lib, ularning qiyofasini qayta-qayta tasvirlashdan erinmayman.
Moddiyat ham kerak, shu bois pulga ham portretlar tayyorlab turaman. Oldinlari kuniga beshtagacha suratlar tayyorlar edim. Bir oy uzluksiz shu holatda ishlaganim uchun sog‘lig‘imda muammolar paydo bo‘ldi. Shu sabab hozir kamroq chizyapman. Bu mashg‘ulotim ortidan 1000 dollardan 3000 dollargacha pul ishlab topaman.
“Noodatiy san’atni rivojlantirmoqchiman”
— Kelajakda bu sohani yanada rivojlantirmoqchiman. YouTube blogerlik bilan shug‘ullanish niyatim bor. O‘zim kabi noodatiy ishlar bilan shug‘ullanayotgan yoshlarga yordam berib, ularni ommaga tanilishi hamda boshqa davlatlarda bo‘layotgan musobaqalarda qatnashi uchun qo‘llab-quvvatlamoqchiman. Odamlar bunaqa noodatiy san’atlarni ham tushunishiga yordam bermoqchiman. Chunki mendek noodatiy ishlar bilan hamma odamlar ham shug‘ullanmaydi. Bunday insonlar e’tiborsiz, chekka qishloqlarda qolib ketishini xohlamayman, — deydi Husan Mirzahabibov.
Gavhar Eshonqulova suhbatlashdi
Izoh (0)