To‘g‘ri ovqatlanish tartibiga ongli yondashish normal vaznni saqlab qolish bilan birga kun davomida o‘zingizni yaxshi his etishingiz uchun energiya beradi. Unga amal qilish doim ham oson bo‘lavermaydi, asosiysi, sekin-asta boshlash va izchil davom ettirishdir.
Sog‘lom ovqatlanish tartibiga amal qilishni uyqudan avval iste’mol qilish tavsiya etilmaydigan mahsulotlarni yemaslikdan boshlash mumkin. Buning uchun biz mutaxassis diyetologlar maslahatiga quloq tutamiz.
Nima uchun kechki ovqatni nazorat qilish kerak?
Tungi uyqu nafaqat tananing jismonan dam olishi uchun, balki ichki organlarning o‘z kuchini tiklab olishi uchun ham muhim. Uyqudan avval tamaddi qilish natijasida tanadagi energiyaning katta qismi ichki organlar tiklanishiga emas, ovqat hazm qilishga sarflanadi. Bu esa umumiy salomatlikda aks etadi.
Demak, uyqudan avval nimalar yeyish taqiqlanadi?
Non mahsulotlari
Non mahsulotlaridagi yuqori darajadagi glikemik indeks hamda kraxmal insonga qisqa muddatga to‘yinganlik hissini beradi va ko‘p o‘tmay yana ochlik hissi paydo bo‘ladi. Tunda non mahsulotlari va shirinliklar bilan tamaddi qilish qondagi shakar miqdorini oshiradi, u o‘z navbatida kortizol ishlab chiqarilishiga imkon beradi. Aynan shu gormon biz kechasi ko‘p uyg‘onishimiz sababchisidir.
Shuning uchun, tunda shirinliklar, xamir ovqatlar, makaron, kartoshka va barcha kraxmalli sabzavotlar, quritilgan mevalarni cheklash lozim. Ularning bari qorin sohasida yog‘ to‘playdi.
Kefir
Ko‘pchilik tunda kefir ichib yotish sog‘lom odat deb hisoblaydi. Aslida esa tunda iste’mol qilingan bir stakan kefir umumiy salomatlikni yaxshilash nuqtayi nazaridan noto‘g‘ridir.
Sababi yuqorida keltirilgan mahsulotlar kabi — glikemik indeks tufaylidir. Yotishdan avval muntazam ravishda kefir ichish uglevod almashinuvining buzilishiga olib kelishi mumkin.
Yog‘li souslar
Ushbu turdagi mahsulotlar yuqori kaloriyasi va hazm qilish qiyinligi bilan ajralib turadi. Souslar tarkibi tuz, shakar, ta’mni kuchaytiruvchilar, glyuten, shirin ta’m beruvchilar, quyuqlashtiruvchi moddalar hamda rang beruvchi turli moddalarni o‘z ichiga oladi. Bularning barchasi oshqozon uchun og‘ir yuk va stress bo‘lib, uyqudan avval iste’mol qilish zararlidir.
Dudlangan go‘sht va kolbasa mahsulotlari
Ushbu turdagi oziq-ovqatlarning hech qanday foydali jihati yo‘qligi barchamizga ma’lum. Shuning uchun tungi tamaddiga kolbasa mahsulotlarini qo‘shish mutlaqo xatodir.
Spirtli ichimliklar
Alkogolning zararli jihatlari haqida barcha yoshdagi insonlar xabardor, lekin shunday bo‘lsa ham, eslatib o‘tishni joiz topdik. Tunda ichilgan spirtli ichimlik uyquning eng chuqur fazasi — to‘rtinchi bosqichini tormozlaydi. Ushbu bosqich xotira, idrok va ijodkorlik uchun javob beradi, miya yetarli dam olishi hamda tiklanishni ta’minlaydi.
Izoh (0)