Yozning issiq kunlarida turli cho‘milish havzalari va basseynlarga tashrif buyuradigan yosh-u qarilar soni ortadi. Ammo havo harorati va hovuzdagi odamlar soni qanchalik yuqori bo‘lsa, turli kasalliklar yuqtirib olish xavfi shunchalik oshadi. Chunki issiq havo va suv orqali odam terisidagi turli bakteriya va infeksiyalar boshqalarga o‘tishi mumkin.
Albatta basseynlardagi avtomatik ravishda xlorlash tizimi va dezinfeksiyalash vositalari bakteriyalar bilan yaxshi kurashadi, lekin shunday viruslar borki, ular kurashuvchan va xlorga chidamlidir. Quyida ana shunday kasalliklarni ko‘rib chiqamiz.
Diareya
Xalq orasida ich og‘rig‘i, ich ketishi nomlari bilan ataladigan diareya kasalligi ichak yo‘llarining funksional buzilishi hisoblanib, ichaklarni tez-tez bo‘shatish va ichning suyuq holatda kelishi bilan kechadi. Diareya bilan kattalar ham, bolalar ham kasallanishi mumkin. Agar ich ketish bilan og‘rigan odam hovuzda bo‘lganida o‘zini nazorat qila olmasa, millionlab mikroblar bir zumda suvga tushadi va atrofga tarqaladi.
Afsuski, gigiyena qoidalariga rioya qilmaydigan shaxslar ham uchrab turadi. Diareya xuruji tugagandan so‘ng, yuvinish o‘rniga shunchaki hojatxona qog‘ozidan foydalanadiganlarda zararli bakteriyalar saqlanib qoladi. Bunday holatda mikroblar oz miqdorda bo‘lsa ham, suvga tushadi.
Quloq kanali infeksiyasi
Tashqi otit — quloq tashqi kanalining yallig‘lanishi bo‘lib, kasallik to‘g‘ridan-to‘g‘ri eshitish kanalida sodir bo‘ladi. U quloqlarni noto‘g‘ri tozalash yoki toza bo‘lmagan havzalarda cho‘milish orqali rivojlanadi.
Aslida quloqlar ichidagi tabiiy ajralma — quloq shirasi himoya vazifasini bajaradi. Ammo basseyn suvi tarkibidagi xlor uni bunday xususiyatdan mahrum qiladi. Natijada quloq tashqi kanali oltin stafillokok yoki ko‘k yiring tayoqchasi kabi barcha turdagi zararli mikroorganizmlarga yo‘l ochadi.
Teri va shilliq pardalarning qizarib, qichishishi
Aslida basseyndagi xlor hech qanday hidga emas. Hovuzda cho‘milayotganda chiqqan xlor hisi suvdagi teri, kirlar va siydik bilan reaksiyaga kirishgandan hosil bo‘ladi va gazga aylanadi. Ular xloramin deb ataladi va terida qizarish, achishish, qichishish, turli toshmalar, burun shilliq qavatining shishishi, yo‘tal, konyunktivit va rinitga olib kelishi mumkin.
Shuning uchun suvga tushishdan avval va keyin dush qabul qilish muhimdir.
Follikulit — issiq hammom toshmasi
Bunday kasallik yetarli darajada xlorlanmagan issiq vanna va jakuzilar qabul qilgandan rivojlanadi, chunki xlor issiq suvda tezroq parchalanadi, bu terini bezovta qiluvchi Pseudomonas aeruginosa bakteriyalarining omon qolishiga imkon beradi.
Follikulit belgilari odatda cho‘milgandan keyin bir necha soat ichida paydo bo‘ladi, lekin ba’zi hollarda toshmalar bir necha kundan so‘ng chiqishi mumkin.
Legionellyoz
Legionerlar kasalligi basseyndan yuqishi mumkin bo‘lgan eng jiddiy va pnevmoniyaning og‘ir formasidir. Uni Legionella pneumophila bakteriyasi qo‘zg‘atadi hamda nafas yo‘llariga infeksiyalangan suv kirganda paydo bo‘ladi. O‘pkaga mikroorganizmlar kirishi bilan infeksiya yashin tezligida tanada tarqala boshlaydi.
Xlor va brom bilan zararsizlantirilgan suvda Legionella bakteriyasi tezda nobud bo‘ladi, ammo hovuz egasi xavfsizlik qoidalariga amal qilmasa, ko‘plab insonlarga zarar yetishi mumkin.
Legioner kasalligining belgilari: nafas qisilishi, yo‘tal, titroq, ko‘krak qafasidagi og‘riqlar va harorat 40 ° C yoki undan yuqori bo‘lishi. Kasallikning bunday belgilari paydo bo‘lsa, darhol tez yordam chaqirish zarur. Ko‘pchilik bemorlar faqatgina kasalxonada davolanadi.
Hovuzda yuqadigan kasalliklardan himoyalanish usullari
- Avvalo suv yutmaslik;
- Yaqinda kasallikdan tuzalgan bo‘lsangiz, basseynga bormaslik;
- Issiq hovuzda cho‘milmaslik;
- Quloqlaringizga suv kirmasligi uchun quloq tiqinlaridan foydalanish va qalpoq kiyish;
- Tananing biror joyi kesilgan yoki tirnalgan bo‘lsa ham basseynlarga bormaslik;
- Hovuz suvi qanchalik tez-tez almashtirilishi surishtirish;
- Dushda yoki basseyn yaqinida yalangoyoq yurmaslik;
- Cho‘milishdan avval va keyin sovun bilan dush qabul qilish.
Izoh (0)