Parij Olimpiadasi vaqtida terakt uyushtirishni reja qilgan shaxs qo‘lga olindi

Jironda departamenti (Fransiya janubi-g‘arbiy qismi) politsiyasi Parijda bo‘lib o‘tadigan Olimpiada o‘yinlari vaqtida terakt tayyorlaganlikda gumon qilingan erkakni qo‘lga oldi.

Bu haqda Milliy aksilterror prokuraturasi (PNAT)ga tayanib, RMC radiostansiyasi ma’lum qildi.

“Jironda departamentida 18 yoshli yigit hibsga olingan”, — deyiladi xabarda.

Qo‘lga olingan shaxs terrorchilik guruhida ishtirok etganlikda gumon qilinmoqda. Qayd etilishicha, u ijtimoiy tarmoqlardagi xabarlarida “ayniqsa, sport musobaqalari vaqtida jinoiy harakatlar sodir etish” niyatida ekanligini bildirgan.

Olimpiya o'yinlari 26-iyuldan 11-avgustgacha bo'lib o'tadi. 2024-yilgi Olimpiadaning ochilish marosimi birinchi marta stadion tashqarisida o'tkaziladi, unda 10 500 nafar sportchi Sena daryosi bo'ylab qayiqlarda Parij markazidan suzib o'tadi. Ochilish marosimida yuzaga kelishi mumkin bo‘lgan tahdidlarning yuqori xavfini hisobga olib, tomoshabinlar sonini 600 mingdan 326 ming kishiga kamaytirishga qaror qilindi.

Musobaqa vaqtida xavfsizlikni 45 mingga yaqin fransuz politsiyasi va jandarmi, shuningdek, 20 ming harbiy ta’minlaydi.

Avvalroq Parij politsiyasi mas’uli Loran Nunes Fransiyada terrorchilik tahdidi doimiy ekanligini bir necha bor ta’kidlagan edi.