Versal va Bukingem saroylari Saudiya qirollik oilasining hashamatli qasrlari oldida oddiy binodek ko‘rinadi. Yaqin qarindoshlari 2000 kishidan ortiq bo‘lgan eng badavlat qirollik sulolasi dunyo bo‘ylab yuzlab ajoyib ko‘chmas mulklarga ega. Ar-Riyodning tillo saroylari va sahroda qurilgan 195 million dollarlik majmuadan tortib, Londondagi milliarderlar uylar qatoridagi o‘nlab qasrlar shular jumlasidandir. Bugungi maqolada dunyodagi eng qimmatbaho ko‘chmas mulklarga ega Saudiya qirolligi binolari haqida so‘zlashamiz.
Saudiya Arabistoni podshohi Salmon ibn Abdulaziz Al-Saud
Zamonaviy Saudiya Arabistoni Qirolligi 1932-yilda qirol Abdulaziz Al-Saud tomonidan tashkil etilgan. Neftga boy bu davlat bir asrdan kamroq vaqt ichida sulola tomonidan boshqarilib, dunyodagi global mamlakatlardan biriga aylangan. Salmon ibn Abdulaziz Al-Saud 2015-yil 23-yanvardan beri davlat boshlig‘i sifatida ishlab kelmoqda. U davlat asoschisi Salmonning 25-o‘g‘li bo‘lib, uning ixtiyorida bir nechta saroylar bor. Ularning 1,4 trillion dollarga baholangani esa ko’pchilik uchun ajablanarli emas.
Al-Yamama saroyi, Ar-Riyod, Saudiya Arabistoni
Al-Yamama saroyi Saudiya Arabistoni poytaxti Ar-Riyodda joylashgan. U qirollikning rasmiy qarorgohidir va shtab-kvartirasi sifatida xizmat qiladi. Saroyning uzunligi 370 ming metr kvadrat bo‘lib, 1000 dan ortiq xonasi bor. Ushbu qarorgoh 1983-yilda qurilgan. Uning atrofida bir nechta basseyn, masjid va kinoteatrlar ham mavjud. Nafis, zamonaviy geometrik naqshlar va qirrali derazalari bilan an’anaviy Najd me’morchiligiga o‘xshaydi. Saroyda hayratlanarli qandillar, chiroyli gilamlar, noodatiy dekorativ buyumlar va oltin bilan bezalgan naqshlar mavjud.
Italiyadan keltirilgan marmar pollar va zarhal devorlar va dabdabali ustunlari bilan ham saroy ajralib turadi. Qirol Salmon binoda hukumat yig‘ilishlari va xorijdan kelgan nufuzli mehmonlarni shu yerda kutib oladi. Prezidentlar bilan uchrashuvlar ajoyib oq gilamlar, bejirim tikilgan parda, zarhal devorli binoda bo‘lib o‘tadi.
Erga saroyi, Ar-Riyod, Saudiya Arabistoni
Qirol Salmon shunchalik boyki, mehmonlarni qabul qiladigan saroylari talaygina. Ar-Riyod markaziga yaqin hamda yaqinda qurib bitkazilgan Erga saroyi shulardan biridir. Palma daraxtlari, favvoralarga to‘la bu saroy rasmiy qarorgohdan kam emas. 2015-yilda qirol bo‘lganiga unchalik ko‘p bo‘lmagan Salmon AQSHning o’sha vaqtdagi prezidenti Barak Obamani qabul qilgan. Amerika prezidenti marhum qirol Abdulla ibn Abdulazis Al-Saudning vafoti munosabati bilan hamdardlik bildirgan.
Saroyning rasmiy xonalaridan birida hattoki chiqindi qutisi ham kumushdan yasalganiga e’tibor bering. Erga saroyidan asosan hukumat vazifalari, davlat qabullari, turli davlatlardan kelgan xorijiy mehmonlar bilan uchrashuvlar o‘tkazish maqsadida foydalaniladi. Bundan tashqari, majmuada Saudiya san’ati va urf-odatlarini xalqaro miqyosda yoyish maqsadida festivallar ham o‘tkaziladi.
Murabba saroyi, Ar-Riyod, Saudiya Arabistoni
32 xonadan iborat bo‘lgan Murabba saroyi 1945-yilda qurilgan. Hozirda undan qirol oilasining asosiy qarorgohi sifatida foydalaniladi. Bino jamoatchilik uchun ham ochiq. Saroy Najdiy usulida qurilgan bo‘lib, ko‘plab qadimiy arxitektura va dizaynlarini o‘zida mujassam etgan.
Saroy ikki qavatdan iborat bo‘lib, mehmonlarni qabul qiladigan xonalar va qirollik oila a’zolari xonalariga bo‘linadi. Rasmda saroyning markaziy hovlisi bo‘lib, u oq rangda. 1990-yillarda saroy va uning atrofida yirik qayta qurish loyihasi amalga oshirilgan. Usta Ibn G‘azo tomonidan qurilish holati saqlanib qolingan hamda mahalliy materiallardan foydalanilgan. Majmuada ziyofat xonalari ham bo‘lib, u marmar ustunlar va rang-barang fors gilamlari bezatilgan.
Yillar davomida saroyga ko‘plab taniqli insonlar tashrif buyurgan. 2017-yili may oyida tashrif buyurgan Donald Tramp qilichbozlik raqsidan zavqlangan. Bir necha yillar oldin esa prezident Jorj Bush saroyga aylangan muzey bo‘ylab sayohat qilgan.
Shahzoda Muhammad ibn Salmon Al-Saud
Qirol Salmonning yettinchi o‘g‘li va taxt vorisi shahzoda Muhammad 2022-yildan beri bosh vazir bo‘lib ishlaydi, uning bir nechta saroylaridan tashqari 500 million dollarlik yaxtasi ham bor. Shahzoda bundan tashqari dunyo bo’ylab ham sayohat qilishni yaxshi ko‘radi. Uning Yevropadagi uylari dunyodagi eng qimmatbaho ko‘chmas mulklar sirasiga kiradi.
Fransiyadagi Chateau Louis XIV saroyi
Fransiyada Luvesyen shahrida joylashgan, Versaldan unchalik uzoq bo‘lmagan bu bino 17-asrga tegishli fransuz an’analariga mos ravishda qurilgan. New York Times jurnalistlarining ma’lumotlariga ko‘ra, shahzoda qal’aga o‘xshash mazkur bino uchun 2015-yilda 300 million dollar sarflagan.
Parijning g‘arbiy chekkasida joylashgan uy dunyoning eng qimmat uylaridan hisoblanadi. 57 gektarlik maydonli binoda oltin suvi yuritilgan poydevorlar, turli bezakli marmar haykallar, ekzotik daraxtlar va to‘siqli labirint mavjud. Favvoralarni esa iPhone orqali boshqarish mumkin. Bino tarixiy yodgorliklarga boy bo‘lsa ham 2011-yilda qurilgan. Aytilishicha, ushbu dabdabali bino qurilishi uchun 19-asrdagi qadimiy ko‘chmas mulk buzib tashlangan. Saroyda ikkita bal zali, kinoteatr, ikkita basseyn va shahzodaning san’at kolleksiyasini namoyish etish uchun mo’ljallangan yerosti maydoni mavjud.
Shahzoda Xolid ibn Salmon Al-Saud
Shahoda Qirol Salmonning to‘qqizinchi farzandi hamda valiahd shahzoda Muhammad ibn Salmon Al-Saudning ukasi. Shahzoda Xolid 2022-yildan beri Saudiya Arabistoni mudofaa vaziri lavozimida ishlaydi, uch yil davomida o‘rinbosar ham bo‘lgan. Lavozimga tayinlanishidan oldin u ko‘p vaqtini Vashingtonda o‘tkazgan. U 2017-yil aprelda Saudiyaning AQSHdagi elchisi lavozimida ham faoliyat yuritgan. U AQSHdagi Jorjtaun universitetini bitirgan.
Nur saroyi, Virjiniya shtati, AQSH
Daily Mail nashrining xabarlariga ko‘ra, shahzoda Xoliq talaba bo‘lib yurgan vaqtda ushbu saroyni 12 million dollar naqd pulga xarid qilgan. Yevropa uslubida qurilgan binoning maydoni 1900 metr kvadrat uy bo‘lib, hovlisi 5,5 gektardan iborat. Shovqinli AQSH poytaxtidan yarim soatlik uzoqlikda joylashgan saroyning ichkarisiga kirsangiz, binoning ustunlari yunoncha uslubda ekanligining guvohi bo‘lasiz.
Saroyda 8 ta yotoqxona, 13 ta hammom va ko‘plab boshqa maqsadlardagi xonalar mavjud. Shahzoda egallagan dabdabali xonadon yuqori qavatidan turib ajoyib bog‘larni, turli xil manzaralarni tomosha qilish mumkin. Saroy boshqa binolardan hashamatliligi, qulayliklari, kinoteatr, bilyard xonasi, basketbol maydoni hamda ochiq maydonidagi basseyni bilan ham ajralib turadi.
Izoh (0)