Poliz ekinlari, meva va sabzavotlarni bugungi kunda istalgan faslda do‘konlardan topish imkoni bo‘lsa-da, mutaxassislar tarvuzni aynan yoz mavsumida yeyishni tavsiya qiladi. Chunki tabiiy yo‘l bilan pishib yetilgan tarvuzda ozuqa moddalari to‘planishi vaqt, harorat, namlik va yorug‘lik darajasi bilan bog‘liq. Hozirda esa ayni pishiqchilik davri, tarvuz ham serob. Ushbu xushta’m mahsulotning salomatlik uchun bir nechta foydalarini ko‘rib chiqamiz.
Tanadagi suv muvozanatini saqlaydi
Tarvuz 92 foiz suvdan iborat, shuning uchun u tanamizni suvsizlanishdan himoya qiladi. Organizmning suvga to‘yinishi ayniqsa yoz faslida muhimdir. Shunda tanamiz qizib ketmaydi, teri elastikligini yo‘qotmaydi va sochlar ham jiloli bo‘ladi.
Ortiqcha vaznni yo‘qotishga yordam beradi
Tarvuz nafaqat chanqoqbosdi, balki to‘yimli ekin hamdir. U bir martalik tamaddi o‘rnini bosishi mumkin. Tarvuz o‘zining past kaloriyasi tufayli ozish maqsadida parhez tutayotganlarga foydalidir.
Qondagi qand darajasini normallashtiradi
Tarvuz tarkibidagi antioksidant birikmalar organizmdagi glyukoza almashinuvini tezlashtiradi, bu esa qondagi shakar miqdorining keskin ko‘tarilishining oldini oladi. Shuning uchun tarvuz hatto qand kasalligiga chalinganlar uchun ham xavfsizdir.
Yurak-qon tomir tizimini mustahkamlaydi
Tarvuzda qondagi yomon xolesterin darajasini kamaytiradigan va yurak-qon tomir kasalliklarining oldini oladigan ko‘plab antioksidantlar mavjud.
Astma belgilarini yengillashtiradi
800 gramm tarvuz C vitaminining kunlik ehtiyojini o‘z ichiga oladi. Nafas yetishmasligi bilan bog‘liq astma kasalligida bu vitamin miqdori kamayib ketadi, shuning uchun tarvuz astma alomatlarini yengillashtirishda yordam beradi.
Saraton va yallig‘lanishga qarshi
Tarvuz o‘zidagi antioksidantlar va C vitamini tufayli saratonning oldini olishga yordam beradi, yallig‘lanishni kamaytiradi, erkin radikallarni yo‘q qiladi. Shuningdek, tarvuz suyaklar, tishlarni mustahkamlaydi, yaralar bitishini tezlashtiradi.
Nerv tizimini faollashtiradi
500 gramm tarvuz kaliyga bo‘lgan kunlik ehtiyojning yarmini o‘z ichiga oladi. Ushbu moddaning yetishmasligi oyoq-qo‘llarning uvushishi, bosh og‘rig‘ini keltirib chiqaradi. Shuning uchun tarvuzni muntazam iste’mol qilish turli asab kasalliklari, jumladan, demensiyaga chalinish xavfini kamaytiradi.
Oftob urishidan himoya qiladi
Iste’mol qilingan bir necha bo‘lak tarvuz tanangizni qizib ketishdan qutqaradi, chunki ushbu ekinda tana haroratini tartibga soluvchi va mo‘tadil saqlovchi elektrolitlar mavjud.
Buyraklar orqali toksinlar chiqib ketishiga yordam beradi
Tarvuz tarkibida siydik-tanosil tizimiga ijobiy ta’sir ko‘rsatadigan kaliy va kalsiy mavjud. Bu minerallar buyraklar faoliyatini yaxshilashga yordam beradi, organizmdan zararli moddalar va toksinlarni chiqarib tashlashga ko‘maklashadi.
Ko‘rish qobiliyatini tiklaydi
Tarvuz tarkibidagi A vitamini ko‘zlar salomatligini mustahkamlaydi va uzoq yillar davomida o‘tkir ko‘rish qobiliyatini saqlab qolishga yordam beradi.
Teri va sochlar uchun foydali
Tarvuzdagi A va C vitaminlari tanamizda kollagen ishlab chiqarilishiga yordam beradi. U teri namligi, elastikligi uchun javobgardir. Tarvuz, shuningdek, sochlarning silliq va jiloli bo‘lishiga hissa qo‘shadi.
Ichaklar faoliyatini yaxshilaydi
Tarvuz tarkibida ichak mikroflorasiga ijobiy ta’sir ko‘rsatadigan o‘simlik tolalari mavjud. Ular qabziyat va ovqat hazm qilish tizimidagi ayrim muammolarda foydalidir.
Izoh (0)