Yaman shimolida hukmronlik qiluvchi “Ansor Alloh” harakati (husiylar) Isroil Falastinga bo‘lgan tajovuzini to‘xtatishi bilanoq unga hujum qilishni to‘xtatadi. Bu haqda Eron TIV matbuot kotibi Nosir Kanoniy haftalik matbuot anjumanida ma’lum qildi.
Uning qo‘shimcha qilishicha, Yaqin Sharq mintaqasida inqirozning kuchayishini bartaraf qilishi shart bo‘lgan Qo‘shma Shtatlar Isroil sodir etgan jinoyatlar uchun javobgarlikni o‘z zimmasiga olishi kerak.
Xalqaro hamjamiyat Isroil rejimining “qotil mashinasi”ni to‘xtatsa tinchlik keladi. Isroil rejimi tajovuzini to‘xtatgandan so‘ng, Yaman Milliy Najot Hukumati ham rejimga qarshi hujumlarini to‘xtatadi. Qo‘shma Shtatlar Isroilning jinoiy harakatlari uchun jiddiy javobgarlikni o‘z zimmasiga olishi va mintaqadagi inqirozning kuchayishiga to‘siq bo‘lishi kerak, deydi eronlik rasmiy.
Avvalroq Qo‘shma Shtatlar va Buyuk Britaniya Hudaydadagi husiylar pozitsiyalariga besh marta havo hujumi uyushtirgani xabar qilingan edi. Hodisa natijasida Hudayda portidagi yoqilg‘i baklarida katta yong‘in boshlangan.
Husiy harbiy voizi Yahyo Sariya harakat G‘azoni qo‘llab-quvvatlash amaliyotlarini to‘xtatmasligini va Isroilning Hodaydaga bergan havo hujumlariga javob berishini ta’kidlagan. Husiylar Sog‘liqni saqlash vazirligi Isroilning Hudaydaga bergan havo hujumi oqibatida halok bo‘lganlar soni olti nafarga yetganini, 83 kishi yaralanganini, yana uch kishi bedarak yo‘qolgan deb hisoblanganini ma’lum qilgan.
Husiylar avvalroq Falastinni qo‘llab-quvvatlashi va Isroil bilan bog‘liq har qanday kemaga hujum qilish niyatida ekanini e’lon qilib, boshqa davlatlarni ulardan o‘z ekipajlarini chaqirib olishga va ularga dengizda yaqinlashmaslikka chaqirgan edi. Shu bilan birga, husiylar mintaqada navigatsiya erkinligiga xalaqit bermasliklarini va boshqa davlatlarning kemalariga tegmasliklarini aytgan.
Izoh (0)