AQSH Maxfiy xizmati rahbari Kimberli Chitl kongressdagi tinglovda Donald Trampga suiqasd AQSH Maxfiy xizmatining bir necha o‘n yilliklardagi eng katta muvaffaqiyatsizligi bo‘lganini tan oldi.
U qo‘l ostidagi xodimlarining harakatlari uchun to‘liq javobgarlikni o‘z zimmasiga olishini ta‘kidladi.
Chitl hujumdan oldin miting hududida shubhali shaxs haqida ma‘lumot bo‘lganini tasdiqladi.
“Shubhali shaxs yurgani ma’lum qilingandi. Agar xavfsizlik xodimlari tahdidlar haqida aniq maʼlumotga ega bo‘lsa, Trampning sahnaga chiqishiga ruxsat berilmagan bo‘lardi”, deya tushuntirdi u.
AQSH Maxfiy xizmati Ichki xavfsizlik departamenti tarkibiga kiradi. U davlat rahbarlarining xavfsizligi uchun javobgardir. Xavfsizlik birinchi navbatda prezident, vitse-prezident (shu jumladan, saylangan, lekin hali lavozimga kirishmaganlar) va ularning oila a‘zolariga ta‘minlanadi. Sobiq prezidentlar va ularning turmush o‘rtoqlari o‘n yil muddatga himoya qilinadi. 1968-yilda Robert Kennedining saylovoldi mitingida o‘ldirilishidan so‘ng Maxsus xizmat saylovdan 120 kun oldin asosiy prezidentlikka nomzodlarni ham himoya qilishga qaror qildi.
Trampga suiqasd 13-iyul kuni Pensilvaniyada saylovoldi tashviqoti chog‘ida sodir bo‘lgan. Gumonlanuvchi, 20 yoshli Tomas Metyu Kruks voqea joyidan yuz metr narida joylashgan sanoat binosining tomida bo‘lgan, u bir necha marta o‘q uzgan, shundan so‘ng u yo‘q qilingan.
Tramp qulog‘idan yaralangan, tomoshabinlardan biri halok bo‘lgan, yana ikki nafari yaralangan.
Izoh (0)