AQSHda byudjetdagi muammolar tufayli yangi avlod qiruvchi samolyotlari ishlab chiqarish dasturi to‘xtatilishi mumkin. Bu haqda Reuters nashri xabar berdi.
Manbada aytilishicha, AQSH harbiy-havo kuchlari uchun texnologik inqilob sifatida ko‘rilgan yangi avlod qiruvchi samolyotlari dasturi byudjet bosimi, mablag‘ ajratishda davlat ustuvor yo‘nalishlari o‘zgarishi tufayli amalga oshmasligi mumkin. Dasturni saqlab qolish uchun hukumat sarf-xarajatlar nazoratini qayta ko‘rib chiqishi kerak.
Muhokamalarga sabab bo‘lgan dastur Next Generation Air Dominance (NGAD) deb nomlangan. Ushbu dastur oltinchi avlod uchar qurilmalari hisoblangan F-22 Raptor qiruvchi samolyotlarini ishlab chiqarish va ularni AQSH mudofaa hukumatiga topshirishini ko‘zda tutadi.
Dastur asosida, shuningdek, dunyodagi eng zamonaviy havo radarlari, lazerli hujum qurollari va sensorli harbiy texnologiyalar ishlab chiqarish maqsad qilingan. Rasmiylar yangi harbiy texnologiyalarga sunʼiy intellektni integratsiya qilishni rejalashtirgan.
Next Generation Air Dominance dasturi 2029-yilda yakunlanishi belgilangan edi. Ushbu loyihaning umumiy moliyaviy paketi 28,5 milliard dollarni tashil etadi. Endilikda Pentagonning tejamkor harbiy byudjet yuritish harakatlari sabab dastur nomaʼlum muddatga kechikadi yoki to‘xtatiladi.
AQSH mudofaa rahbariyati rasmiylari qiruvchi samolyotlar konstruksiyasini o‘zgartirishni taklif qilgan. Bunda asosiy maqsad arzon va ko‘p sonli qiruvchilar tayyorlashga qaratiladi. Bu esa amalda oltinchi avlod samolyotlarini takomillashtirishni kechiktirish deganidir.
Izoh (0)