Qashqadaryo viloyati hokimi Murotjon Azimov Kuvaytning Gulf General Trading Co. Ltd. kompaniyasi vakillari bilan uchrashuv o‘tkazdi. Bu haqda “Dunyo” AA xabar berdi.
Maʼlum qilinishicha, uchrashuvda turli sohalardagi investitsion loyihalar, jumladan, farmatsevtika mahsulotlarini ishlab chiqarish va sog‘liqni saqlash tizimida hamkorlik qilish masalalari muhokama qilindi.
Kuvaytlik investorlar Qashqadaryo viloyatida farmatsevtika mahsulotlarini ishlab chiqarishni yo‘lga qo‘yish va nogironlikni erta aniqlash, ayniqsa, onkologiya, yurak-qon tomir va qandli diabet kasalliklariga to‘g‘ri tashxis qo‘yish imkonini beruvchi zamonaviy tibbiy laboratoriyalarini tashkil etish bo‘yicha takliflarni bildirdi.
Mazkur loyihalarning amalga oshirilishi natijasida viloyatda yangi ish o‘rinlari yaratilishi, mahalliy aholini sifatli dori-darmonlar bilan taʼminlash imkoniyatlari va umumiy sog‘liqni saqlash tizimi samaradorligi oshishiga xizmat qilishi taʼkidlandi.
Uchrashuv yakunida tomonlar hamkorlikni yo‘lga qo‘yish bo‘yicha muloqotlarni davom ettirish to‘g‘risida kelishuvga erishdi.
Izoh (0)